भांगरभूंय | प्रतिनिधी
मुरगांवः चिखले रजिना मुंडी शाळे लागसार दोन अज्ञातांनी 7 मेक रातचीं 12 ते फांतोडेर 3.30 वरां मजगतीं जोसेफ सिक्वेरा हांच्या बंगल्यांत घुसून सुमार 1 लाख 60 हजारांची चोरी केली. एमआरआय मनशाच्या घरांत ही चोरी जाली.
पुलिसांनी दिल्ले म्हायती प्रमाण आशिष सिक्वेरा हांणी हे संबंदांत पुलिशेंत कागाळ दाखल केल्या. ज्या बंगल्यांत चोरी जाला तो बंगलो आशिषाचो भाव जोसेफ सिक्वेरा हांचो आसा. आशिष नुव्यां रावता. जोसेफ एप्रीलांत गोंयांत आयिल्लो. 28 एप्रीलाक तो परतून गेलो, तेन्ना सावन तो बंगलो बंद आशिल्लो. बंगल्याचें ग्रिल्स मोडून अज्ञातांनी बंगल्यांत प्रवेश केलो आनी थंयच्यो मोलादीक वस्तू चोरून व्हेल्यो.
आशिषाक ही म्हायती मेळ्ळे उपरांत तांणी जोसेफ हांकां फोना वयल्यान ही खबर दिली. तशेंच घरांत वचून पळोवणी केली तेन्ना 500 पावंडांच्यो भांगराच्यो वस्ती आनी सुमार 30 हजार रुपया मेळून 1 लाख 60 हजारांची चोरी जाल्ल्याचें लक्षांत आयलें. पुलिसांनी हे घडणुकेचो पंचनामो केलो. दोन अज्ञातांनी ही चोरी केल्या आनी ते सीसीटीव्ही कॅमेरांत कैद जाल्यात. पुलिसांनी सीसीटीव्ही फुटेज पळयल्या आनी ते नदरेन तपास सुरू केला. त्या दोनूय चोरांक सोदचे खातीर पंगड नेमल्यात. पुलीस उपनिरिक्षक स्वप्नील नायक हे पुलीस निरिक्षक कपील नायक हांच्या मार्गदर्शना खाला फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
