भांगरभूंय | प्रतिनिधी
रत्नाकर ठाकुर ह्या फिशाल हार्मोनियम वादकान संगीतबद्ध केल्लें आनी परेश ठाकुर हाणें रचिल्लें ‘बिलनशी नागीन निघाली’ हें गीत आज लेगीत ऑर्केस्ट्रात वन्स मोर मेळयता.
लोकप्रीय गायिका उत्तरा विश्राम केळकर हिचो जन्म रत्नागिरीत 4 नोव्हेंबर 1951 दिसा जाल्लो .उत्तरान मुंबयत ग्रँट रोड वाठारांतल्या ‘सेंट कोलंबा’ हे शाळेंत मुळावें शिक्षण घेतले उपरांत विल्सन महाविद्यालयांत उच्च शिक्षण पुराय केलें. फुडें मुंबय विद्यापीठांतल्यान अर्थशास्त्रांत बी. ए. आनी शास्त्रीय संगीतांतली पदविका संपादन केली. उत्तरा हांची आवय शकुंतला फडके ही वामनराव सडोलीकर हांचे लागीं गायन शिकताली. ताकाच लागून भुरगेपणांतल्यान आवयल्या गायनाचे सूर उत्तराल्या कानांत रिगले आनी ल्हान पिरायेचेर तिका संगीत आवडूंक लागलें. मागीर संगीताचोय प्रवास सुरू जालो. पं. फिरोज दस्तूर हांणी तिका पंचवीस वर्सां शास्त्रीय गायन शिकयलें. संगीतकार यशवंत देव हांचे कडल्यान सुगम संगीत शिकली, जाल्यार संगीतकार श्रीकांत ठाकरे हाचें कडल्यान गितां, गजल आनी भजनांचे धडे घेतले. संगीतकार विश्वनाथ मोरे हांचे कडसून लावणीचे संस्कार घेतले. भुरगेपणांतल्यान गायन सर्तींनी वांटो घेवन तिणें आपल्या गायनाची छाप सोडली.
ऑल इंडिया रेडिओ आयोजित शास्त्रीय, उपशास्त्रीय आनी सुगम संगीत सर्तीतल्या तिनूय प्रकारांत उत्तरान पयलें स्थान मेळयिल्लें. विशेष गजाल म्हणल्यार डिसेंबर 2010 वर्सा उत्तरा केळकरान तेच सर्ती खातीर परिक्षक म्हणूनय काम केलें. 1971 वर्सा ‘हयवदन’ ह्या नाटका खातीर गायिल्ल्या गीताक लागून पार्श्वगायिका म्हणून तिका नामना मेळ्ळी. उत्तराक 1976 वर्साच्या ‘भूमिका’ ह्या हिंदी फिल्मांत शुद्ध कल्याण रागांत एक चीज गावपाची संद मेळिल्ली. ही ल्हान , पूण म्हत्वाचे संदीचें उत्तरान भांगर केलें. उत्तरान हिंदी, मराठी, गुजराती अश्या सुमार धा ते बारा भासांतल्या चारशें परस चड सिनेमां खातीर गितां गायल्यांत. कवयित्री बहिणाबाईल्या जिविताचेर आदारिल्लो एक लघुपट दूरदर्शनाचेर प्रसारीत जाल्लो. तांतून उत्तरा केळकरान बहिणाबाईली मायभास अहिराणींत गायिल्लीं पदां आनी ओवयो लोकप्रीय जाल्यान फुडें त्या पदांची कॅसेटूय आयली. उत्तरान 500 परस चड कॅसेटीं खातीर पदां गायल्यांत. जायरातीच्या मळार लेगीत तिणें कुबल मसाला, उज्ज्वला सुफला खत, रवी पंखे, अमृत मलम ह्या सारक्या जायत्या जाहिरातीं खातीर गितां गायल्यांत.
आवाजांतली गोडसाण आनी तोलून -मापून सोंपें पद्धतीन गावन काळजाक स्पर्श करपी उत्तराल्या गितांच्या मोगींचो व्हडलो वर्ग आसा. तिगेले गितांच्यो जायत्यो कार्यावळी देश – विदेशांत लोकांनी उखलून घेतल्यात. उत्तरान आशा भोसलेल्या हिंदी गीतांचेर आदारिल्ली कार्यावळ ‘सलाम आशा’ रसिकां मुखार हाडली आनी ताचे जायते प्रयोग देस- परदेसांत गाजले. ‘सुरसिंगार’ ह्या चित्रपटांत शास्त्रीय गायना खातीर उत्तरा केळकराक ‘मियां तानसेन’ हो प्रतिश्ठीत पुरस्कार फावो जाला.
उत्कृश्ट पार्श्वगायना खातीर उत्तराक महाराष्ट्र सरकाराचे दोन पुरस्कार फावो जाल्यात. 2010 वर्सात ‘संस्कृती कला दर्पण’ पुरस्कार मेळ्ळा. 2017 वर्सा ‘राम कदम पुरस्कार’ मेळ्ळा. ‘अशी चिक मोत्यांची माळ होती गं तीस तोळ्याची गं’ हें गीत उत्तरा केळकारान गायलां. तें बरेंच गाजलां. रत्नाकर ठाकुर ह्या फिशाल हार्मोनियम वादकान संगीतबद्ध केल्लें आनी परेश ठाकुर हाणें रचिल्लें ‘बिलनशी नागीन निघाली’ हें गीत आज लेगीत ऑर्केस्ट्रात वन्स मोर मेळयता. फुडें व्हीनस कंपनीन ह्या गीताचो आल्बम काडलो आनी थोड्याच काळांत तो लोकप्रीय जालो. तिणें बाप्पी लाहिरी, लक्ष्मीकांत- प्यारेलाल, आनंद- मिलिंद, राम- लक्ष्मण आनी हेर कांय संगीतकारांल्या 20 – 22 फिल्मां खातीर पदां गायल्यांत. 1984 तें 1998 मेरेन ती बाप्पी लाहिरील्या कार्यावळींनी गायताली. टार्झन, डान्स डान्स, सौ करोड़, घर घर की कहानी, माँ कसम, अधिकार, काली गंगा, इन्सानीयत के देवता ह्या सिनेमा खातीर उत्तरान पार्श्वगायन केलां. ‘फूल बने अंगारे’ सिनेमांतलें ‘गोरी कबसे हुई जवान’ हें गीत, लता मंगेशकरांक वेळ नाशिल्ल्यान शूटिंगा पुरतें उत्तरा केळकरान गायिल्लें. तें निर्मातो के. सी. बोकाडियाक आवडलें आनी बप्पीक हें गीत फिल्मांत आस्पावपाक सांगलें. पूण बप्पीन लता मंगेशकराक उतर दिल्लें. म्हूण मागीर तें गीत उत्तरा केळकराले आवाजांत फिल्मांत येवंक ना, पूण बोकाडियान उत्तरान गायिल्लें गीत ‘फूल बने अंगारे’च्या रेडिओ प्रसिद्धी खातीर वापरलें. फाटल्या पांच दशकां सावन उतरालें रेकॉर्डिंगां अखंडपणान चालू आसात.
——————————
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
