भांगरभूंय | प्रतिनिधी
पणजी : गुन्यांव फांट्यान सोमारा रातीं चिकोळणां बस स्टॅण्ड वाठारांत धाड घालून 43.20 कोटी रुपयांचें 4.32 कील कोकेन ही घुंवळे वखदां जप्त केल्या. हे विशीं निबू व्हिन्सेंट (45, मूळ कोलकाता) हाचे सयत मंगेश आनी रेश्मा वाडेकर ह्या घोवा- बायलेक अटक केली. ही गोंय पुलिसांची ड्रग्जा आडची आतां मेरेनची सगल्यांत व्हड कारवाय आशिल्ल्याचें क्रायम ब्रांच पुलीस अधिक्षक राहुल गुप्ता हांणी सांगलें. मंगळारा पणजे जाल्ले पत्रकार परिशदेंत ते उलयताले.
गुप्ता हांणी दिल्ले म्हायती प्रमाण, चिकोळणा कांय जाण ड्रग्ज घेवन येतले अशी म्हायती मेळिल्ली. ते प्रमाण पुलीस निरिक्षक लक्ष्मी आमोणकार, प्रशल देसाय, पुलीस उपनिरिक्षक प्रगती मळीक हांचे सयत पुलीस कॉन्स्टेबल सैमुल्ला मकानदार, नवीन पालयेंकार, सुजय नायक, राहुल नायक, रोशनी शिरोडकार, निगम खोत हांणी सोमारा रातीं चिकोळणा बस स्टॅण्ड वाठारांत तपासणी केली. ह्या वेळार दुबावितांचे बॅगेंत चॉकलेट आनी कॉफीच्या पाकिटांनी लिपयिल्लो कोकेन हें ड्रग्स सांपडलें.
सांपडिल्ल्या पॅकेटांची तपासणी केले उपरांत तो कोकेन आशिल्ल्याचें स्पश्ट जालें. पुलीस चवकशेंत दुबावितान मंगेश आनी रेश्मा वाडेकार (सडो) हे आपले वांगडी आशिल्ल्याचें सांगलें. पुलिसांनी तंत्रीक सर्वेक्षण करून ह्या घोवा- बायलेक मंगळारा दनपरां अटक केली. हाचे पयलीं ह्या दोगांयचेर हेर गुन्यांव दाखल जाल्ले. रेश्मा हिणें कोकेन खंयच्यान हाडलो आनी ते कोणाक विकपाचो आशिल्लो, हे विशीं तपास सुरू आशिल्ल्याचें राहूल गुप्ता हांणी सांगलें.
वास्को पयलो वर्ग न्यायालयान तिगांकूय 6 दिसांची पुलीस कोठडेंत दवरपाचो आदेश दिला.
मुख्यमंत्र्या कडल्यान पुलिसांचें अभिनंदन
गोंय पुलिसांचे कारवायेचीं मुख्यमंत्री डॉ. प्रमोद सावंत हांणी तुस्त केली आनी परबीं भेटयलीं. ही कारवाय सरकाराची घुंवळे वखदां आडची सुरू आशिल्ले लडायेंतलें वचन, दक्षता दाखयता अशी प्रतिक्रिया मुख्यमंत्री डॉ. प्रमोद सावंत हांणी उक्तायली.
तीन म्हयन्यांतलीं आठवी कारवाय
गोंय पुलिसांच्या वेगवेगळ्या खात्यांनी मेळून 2024 वर्सा सुमार 10 कोटी रुपयांचो ड्रग्स जप्त केल्यां, अशें राहुल गुप्ता हांणी सांगलें. ह्या प्रकरणांत 8 गुन्यांव नोंद जाल्यात आनी 12 जाणांक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
