भांगरभूंय | प्रतिनिधी
पणजी : गुन्यांव फांट्यान सोमारा रातीं चिकोळणां बस स्टॅण्ड वाठारांत धाड घालून ४३.२० कोटी रुपयांचें ४.३२ किल कोकेन जप्त केलें. हे विशीं निबू व्हिन्सेंट (४५, मूळ कोलकाता) हाचे सयत मंगेश आनी रेश्मा वाडेकार ह्या घोवा- बायलेक अटक केली. ही गोंय पुलिसांची ड्रग्ज आडची आतां मेरेनची सगल्यांत व्हड कारवाय आशिल्ल्याचें क्रायम ब्रांच पुलीस अधीक्षक राहुल गुप्ता हांणी सांगलें. मंगळारा पणजे जाल्ले पत्रकार परिशदेंत ते उलयताले.
गुप्ता हांणी दिल्ले म्हायती प्रमाण चिकोळणा कांय जाणां ड्रग्ज घेवन येतले अशी म्हायती मेळिल्ली. ते प्रमाण पुलीस निरीक्षक लक्ष्मी आमोणकार, प्रशल देसाय हांचे सयत पुलीस कॉन्स्टेबल सैमुल्ला मकानदार, नवीन पालयेंकार, सुजय नायक, राहुल नायक, रोशनी शिरोडकार, निगम खोत हांणी सोमारा रातीं चिकोळणा बस स्टॅण्ड वाठारांत तपासणी केली. ह्या वेळार दुबावितांचे बॅगेंत चॉकलेट आनी कॉफीच्या पाकिटांनी लिपयिल्लो कोकेन हें ड्रग्स सांपडलें.
सांपडिल्ल्या पॅकेटांची तपासणी केले उपरांत तो कोकेन आशिल्ल्याचें स्पश्ट जालें. पुलीस चवकशेंत दुबावितान मंगेश आनी रेश्मा वाडेकर (सडो) हे आपले वांगडी आशिल्ल्याचें सांगलें. पुलिसांनी तांत्रीक सर्वेक्षण करून ह्या घोवा- बायलेक मंगळारा दनपरां अटक केली. ह्यान पयलीं ह्या दोगांयचेर हेर गुन्यांव दाखल जाल्ले. व्हिन्सेंट कांय दिसां आदीं थायलंडाक वचून आयिल्लो. कोकेन खंयच्यान आयले आनी ते कोणाक दिवपाचे आशिल्ले, हे विशीं तपास सुरू आशिल्ल्याचें राहूल गुप्त हांणी सांगलें.
मजगतीं, गोंय पुलिसांचे कारवायेचीं मुख्यमंत्री डॉ. प्रमोद सावंत हांणी परबीं भेटयलीं. ही कारवाय सरकाराची घवळे वखदां आडची सुरू आशिल्ले लढायेंतलें वचन, दक्षता दाखयता अशी प्रतिक्रिया सावंत हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
