भांगरभूंय | प्रतिनिधी
फाटली कितलींशीच वर्सा सावन प्लास्टर आॅफ पॅरिसाच्या (पीओपीच्या) गणेश मुर्तींचेर बंदी घालपाची मागणी जायत आसा. प्लास्टर आॅफ पॅरिसाच्या मूर्ती कोणे हाडल्यार वा विकतना मेळ्ळ्यार ताचेर कडक कारवाय जातली अशें सुचोवनूय बी कितल्योश्योच तसल्यो गणेश मूर्ती दुसर्या राज्यांतल्यान दर वर्सां गोंयांत येतात. भौशीक जाग्यार तांची विक्रीय जाता. हाचो अर्थ असो जाता की प्लास्टर आॅफ पॅरिसच्या मुर्तींचेर बंदी शक्य ना! सरकाराच्या त्या यत्नाक यश ना! तसल्यो मूर्ती विकतल्याक वा विकत घेतल्याक सैमाचे कांयच पडिल्लें ना!
गोंयांत सादारण 393 मुर्तीकार आसा. ते फकत चिकण मातयेच्योच मूर्ती करतात. कांय जाणाचो तर तो वेवसाय. पूण चड करून ते आपले परंपरीक मुर्ती कलेचे दायज सांबाळपाचो वावर करता. मुर्तीकला ही एक व्हड कला. मुर्तीकारांचें मातये कडेन लागीचें नातें आसता. पूण प्लास्टर आॅफ पॅरिसच्या मुर्तींक लागून कितल्याशाच कलाकाराचें ते आपलेपणाचें नातें तुटपाचो भंय निर्माण जाला. ती परंपरीक मुर्तीकला ना जावपाचो भंय दिसपाक लागला. ही कला जर तिगोवन दवरतले जाल्यार नवे पिळगेक हे कलेचें म्हत्व, पटोवन दिवपाची गरज आसा. ते खातीर सरकारान मुर्ती कलाकारांक प्रोत्साहन दिवचे खातीर मुर्तीकला सर्त वा तसल्यो दुसर्यो येवजण्यो चालीक लावपाची गरज आसा.
मानल्यार देव, ना तर देव पसून फातर, मनांत भक्ती आसल्यार फातरांत देव दिसता! खरें म्हणल्यार प्रत्येक खर्या भक्ताच्या काळजांत देव बसता!! पीओपीची श्री गणेश मुर्ती हाडून पुजली म्हणून कसलेंच पाप लागना. पूण ती मुर्ती पुजेक पात्र आसा काय ना हाचो विचार केल्लो बरो! कित्याक तर शास्त्रा प्रमाण चिकण मातयेचीच मुर्ती पुजेक पात्र आसता, अशे हांव तरी मानता. त्या भायर मुर्ती विसर्जनाच्या वेळार मुर्तीची जी विटंबणा जाता ती वेगळीच. अशा वेळार पीओपीची मुर्ती उदकांत विरगळना. प्रदूशण वाडटा उदकाचें आनी सैमाचें लुकसाण जाता. खूब वेळा आमी पळयलां, विसर्जनाच्या दुसर्या दिसा दर्यादेगेर मुर्ती असहाय जावन पडिल्ली दिसता. तिचे हात, पाय तुटिल्ले, तकली धडा पासून वेगळी जाल्ली, कांय कडेन तर चेहर्यार कान नाशिल्ले, सोंड तुटून पडिल्ली. मुर्ती अर्दी चिखलांत मुंगरून आशिल्ली दिसता. आमी कांय जाणानी बाप्पाच्या विसर्जनाची जबाबदारी बरे तरेन पाळूंक ना हाचें बाप्पाक पासून खुब्ब वायट दिसता. देखून म्हणटा, अश्यो मूर्ती वापरच्यो न्हय. याद दवरात श्री गणेश भक्तांनो…
” गणपती बाप्पा मोरया, तोच मायेचो दर्या! चिकण मातयेची मुर्ती पुजून, सैमाची राखण करूया!!
अविनाश कुंकळकार
7875237830
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
