भांगरभूंय | प्रतिनिधी
भांगरभूंय । प्रतिनिधी
पोरणे गोंयः चिंबल पंचायत वाठारातंल्या शिरांत हांगा हिंदू मसंडभुंये लागी भोवमजली रहिवाशी प्रकल्प उबारपाक रिव्होल्युशनरी गोवन्स पक्षान विरोध केला. ते संबंदीत लोकां मदीं जाग्रुताय करपाचें काम तांणी सध्या सुरू केलां. पक्षाचो फुडारी अजय खोलकार दरेका घरांत वचून लोकांक व्हो प्रकल्प जाल्यार कितें जातलें, हाची म्हायती दिता.
चिंबलची तहकूब केल्ली ग्रामसभा येता त्या आयतार जातली. त्या वेळार ह्या रहिवाशी प्रकल्पाक विरोध करपाचें आरजीन थारायलां. ते खातीर शेनवार मेरेन प्रकल्पा विशीं लोकां मदीं जाग्रुताय करपाचें काम खोलकार आनी आरजीचे हेर वावुरपी करतात. चिंबल वाठारांतल्या लोकां खातीर व्हो प्रकल्प कसो हानीकारक आसा हें आमी समजवून सांगतात, अशें खोलकारान पत्रकारांक सांगलें.
प्रकल्पाच्या आराखड्यांत मसंडभूंय तशेंच प्रकल्पा कडेन वचपी रस्ते दाखयले नात. ह्या प्रकल्पाक आतांचो विरोध केलो ना जाल्यार फुडाराक लोकांक मसंडभुंयेत वचपाक मेळचें ना असो खोलकाराचो दावो आसा. ह्या मसंडभुंयेचो वापर दोन वॉर्डांत आशिल्ले एसटी समाजांतले लोक कुडीचेर निमणे संस्कार करपाक करतात. एसटी समाजाचे 4 हजार लोक ह्या दोन वॉर्डांनी रावतात. रहिवाशी प्रकल्पांत सुमार 50 भूखंड आसात. थंय हेर समाजाचे लोक येवंन रावपाक लागतगीर ह्या दोन वॉर्डांत एसटी समाजाचे लोक उणे जातले असो रेघन कुंडयकार, अविनाश शिरवयकार, तुषार प्रियोळकार ह्या आरजी वावुरप्यांचें म्हणणे आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
