चिंबला चिरे खणीचेर जिलेटीन स्फोटाक लागून थळाव्या मदीं भिरांत

भांगरभूंय | प्रतिनिधी

पणजीः चिंबला मोरंबी ओ ग्रँड चिरे खणीचेर जिलेटीनाच्या स्फोटांक लागून थळाव्या मदीं भिरांत पातळ्ळ्या. ह्या चिरेखणीच्या क्षेत्रांत वाड जावन हे स्फोट कुशीच्या लोकवसणुकी मेरेन पावल्या. थळाव्यांच्या घरांक वेरो वचून कांय थळावे जखमी जाल्यात, अशी कागाळ थळाव्यांनी केले उपरांत घोळट्या पंगडान घडणूक सुवातेर येवन पळोवणी केली.

मोरंबी ओ ग्रँड ह्या चिरेखणीचेर बेकायदो जिलेटिनांचे स्फोट घडोवन दोंगर कातरपाचें काम चालू आसा, अशी कागाळ थळावे अजय खोलकार आनी चेतन नायक हांणी दाखल केल्ली. हे कागाळीची दखल घेत जिल्लोधिकाऱ्यानी घडणूक सुवातेर पुलिसांचो घोळटो पंगड धाडून संबंदीत खात्यांक पळोवणी करपाक सांगलें.

हे विशीं उलयतना, थळावे सरपंच संदीप शिरोडकार हांणी सांगलें, हांगा जिलेटीन स्फोट जावन लोकांक त्रास करतात आनी तांकां कसलीच भिरांत ना. हे विशीं कागाळ थळाव्यांनी पंचायतीत केल्ली.

जिलेटीन स्फोट करतले जाल्यार कायद्या प्रमाण खणीची सुवात लोकवसणुके पसून 165 मीटर पयस आसपाक जाय. पूण हांगासर लोकवसणुकेक तेंकून 50 मिटर अंतराचेर जिलेटीनाचो स्फोट घडोवन हाडटात. पळोवणे वेळार टीसीपी, उदका स्त्रोत आनी रान खात्याचे अधिकाऱ्यांच्या आमी नदरेक हाडून दिला. जो बेकायदो दोंगर कातरपाचो प्रकार चल्ला ताचेर कायद्या प्रमाण कारवाय करची, अशें सांगलां.

खणीचे मूळ लीज आसा तातूंत स्पश्ट नमुद केला, ते प्रमाण खणीची शिम लोकवसणुके पसून 165 मिटर पयस आसपाक जाय. आतां खणीची खोलाय वाडून ही शिम 50 मिटर मेरेन घरांक तेंकल्या, अशें थळावे चेतन नायक हांणी सांगलें.

खण खात्यान 6 वर्सा पयलीं तयार केल्ल्या अहवालांत हे खणीची शीम 100 मिटर आसली. आतां परत जिलेटीन स्फोट घडोवन हाडिल्ल्यान घरांच्या वण्टींक वेरो गेल्यात. खण खात्यान हे अहवालात नमूद केला. स्फोट जाले उपरांत ह्या जिलेटीनाचे कुडके रहिवासी क्षेत्रांत पडटात, अशी कागाळ नायक हांणी केल्या.

हांगासर एक घसघसो आसा आनी पावसाचें उदक सैमीक वाटेंतल्यान ह्या घसघश्यार पावता. लोक घसघश्याचेर येवचे न्हय म्हूण तांणी ही उदकाची वाट बंद केल्या. हाका लागून पावसांत आठ घरांनी उदक घसून बुडटी येता. हे विशींची कागाळ आमी पळोवणेक हजर आशिल्ल्या उदका स्त्रोत अधिकाऱ्यां कडेन केल्या, अशें नायक हांणी म्हणलें.