भांगरभूंय | प्रतिनिधी
पणजी : सांताक्रूझ मतदारसंघांतल्या चिंबल वाठारांत आशिल्ल्यो जायत्यो बेकायदो बोअर वेल सध्या जलस्त्रोत खात्याचे नदरे खाला आसात. संबंदीत बोअर वेल्स आनी बांयच्या धनयांक नोटीसो धाडल्यात. आयच्यान पुलिसांचे हाजेरींत ह्यो बोअर वेल्स सील करतल्यो. विशेश गजाल म्हळ्यार राज्यभर वट्ट १६२ अनधिकृत बोअरवेल आसात. तांतल्या तातूंत एका चिंबल वाठारांतूच सुमार अनधिकृत ६० ते ७० बोअरवेल आशिल्ल्याच्यो कागाळी फेब्रुवारींत उदकास्रोत खात्या कडेन आयिल्ल्यो. हेच फाटभूंयेर पळोवणी करीत ह्यो बांयो सांपडल्यो.
मजगतीं, खात्याचे कार्यकारी अभियंते तशेंच भूजल अधिकार्यांनी धारवाडकर कॉलनी, चिंचवाडा-चिंबल हांगा आशिल्ल्यो सुमार ६० बोअरवेली आयज सोमारा सील करपाचे आदेश दिल्यात. तशेंच हें काम सुरू आसतना पुलीस बंदोबस्त दवरपाचेय निर्देश दिल्यात.
नेमकें हें प्रकरण कितें?
जमनी पोंदच्या उदकांत सेगीत उणाव जाल्ल्यान ताचो फटको नागरिकांचेर बसता. अशे स्थितींत कांय जाण उदकास्रोत खात्याची परवानगी घेनासतनाच बेकायदेशीरपणान बोअरवेल, बांयो खणतूच आसात. हाचो परिणाम उदकाचेर जाल्ल्यान उदकास्रो खात्यान अशे तरेच्यो बेकायदेशीर बोअरवेल, बांयेंच्या धनयांचेर कारवायेची मोहीम सुरू करपाचो निर्णय घेतला.
चिंबला ६० ते ७० बोअरवेल आशिल्ल्याची कागाळ मेळटांच खात्यान तांच्या धनयांक रोखड्योच नोटीस जारी केल्यो. राज्यांतल्या सगल्याच भागांनी अश्यो मोहिमो सुरू करून बेकायदेशीर खणिल्ल्यो बोअरवेली, बांयच्या धनयांक नोटिसो जारी करून, पांच ते धा लाखां मेरेनचो दंड तांचे कडल्यान वसूल करपाचो निर्णयूय खात्यान घेतला. राज्यांत ९६२ बोअरवेली नोंदणीकृत आसात. फाटल्या सुमार तीन वर्सांनी ७८ बेकायदेशीर बोअरवेलीचेर जलस्रोत खात्या वरवीं कारवाय केल्ल्याचें राज्य सरकाराचे आंकडेवारींतल्यान मुखार आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
