भांगरभूंय | प्रतिनिधी
पणजीः चिंबलकारांनी आंदोलन करचें न्हय. तांच्या चार वांगड्यांनी येवन म्हजे वांगडा चर्चा करची. सत्र न्यायालयाच्या आदेशाक आव्हान दिवप काय ना हाचेर कायदेशीर सल्लो घेतले, अशें मुख्यमंत्री डॉ. प्रमोद सावंत हांणी सांगलें.
पणजे सावन विधानसभा संकुला मेरेन चिंबलच्या थळाव्यांनी काडिल्ल्या मोर्चाचो विशय विरोधी पक्ष फुडारी युरी आलेमाव हांणी सभाघरांत काडलो.
युनिटी मॉल रद्द जावचो ही मागणी करीत चिंबलाचे थळावे आंदोलन करतात. मुख्यमंत्र्यान तांच्यो मागण्यो मान्य करच्यो. सरकारान जिल्लो आनी सत्र न्यायालयान युनिटी मॉलाचें बांदकाम लायसेन्स रद्द करपाच्या आदेशाक मान दित ह्या आदेशांक उच्च न्यायालयांत आव्हान दिवचें न्हय अशी मागणी थळाव्यांनी म्हजे कडेन केल्या. देखून मुख्यमंत्र्यान थळाव्यांचे मागणेक मान दिवचो, असो उलो आलेमांव हांणी मारलो.
हे विशीं जाप दितना मुख्यमंत्री डॉ. सावंत हांणी सांगलें, आंदोलकां वांगडा चर्चा उक्ती दवरल्या. तांचे संघटणेच्या चार वांगड्यांनी येवन म्हाका मेळचें. हो विशय उलोवन सोडवया. थळाव्यांनी आंदोलन करचें न्हय. युनिटी मॉल विशींचो आदेश म्हाका काल मेळूंक ना. तो हांवें आयज वाचला. देखून ह्या आदेशाक फुडें आव्हान दिवप काय ना, हे विशीं कायदेशीर सल्लो घेतले, अशी जाप मुख्यमंत्र्यान दिली.
मजगतीं, ह्या आंदोलनाचें लायव्ह कवरेज करपी मिडियाचेर जॅमर वापरून तें बंद करपाचो प्रकार घडलो. अधिवेशन चालू आसतना ह्या प्रकाराची गंभीर दखल सांतआंद्रेचे आमदार विरेश बोरकार हांणी घेवन सभाघराच्या हौदांत धांव घेतली. सरकार मिडियाचो आवाज चेंपपाक सोदता असो आरोप तांणी केलो. बोरकार हांकां हेर विरोधी आमदारांनी तेंको दिलो.
हे विशीं चवकशी करपाक सांगतां अशें मुख्यमंत्र्यान आस्वासन दिले उपरांत विधानसभेचे कामकाज सुरळीत सुरू जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
