भांगरभूंय | प्रतिनिधी
चिंतन – 24
तुका म्हणे राहे चिंतनीं आवडी ।
येणें नांवें जोडी सत्यत्वेंसी ॥
तुकाराम महाराज सांगतात – “जाका चिंतनाची आवड आसा, ताचें नातें खऱ्या अर्थान सत्या कडेन जुळटा.”
आयच्या म्हायतीच्या स्फोटक युगांत हीं उतरां चडूच अर्थपूर्ण दिसतात. दर खिणाक हजारांनी गजालींचो आमच्या कान, दोळ्यांचेर आनी मेंदवाचेर शिंवर जाता. पूण हातूंतलें कितें खरें आनी कितें फट तें वळखुपाक जाय जाल्यार चिंतन हें जायच!
चिंतन म्हणल्यार फकत विचार न्हय. चिंतन करप म्हणल्यार फकत “हांव विचार करतां” इतलेंच न्हय. चिंतन म्हणजे थांबप, विचारांक मनांत खोल भितर घुसोवप, अणभवांचें विच्छेदन करप आनी तातूंतल्यान सत्याचें शुद्ध बीं वेंचून काडप.
अमेरिकेंतल्या मध्यमवर्गीय कुटुंबांत एक चलो वाडटालो. ताचें नांव – नोआम चॉम्स्की. ताची आवय शिक्षक, बापूय भाशाशास्त्रज्ञ. भुरगेपणांत नोआमान कारखान्यांतल्या कामगारांचे हाल ताणें पळयले. पिरायेच्या 10 व्या वर्सा ताणें आपलो पयलो राजकी लेख– फॅसिझम आनी स्पेन – बरयलो. त्या वेळार ताचे हेर इश्ट कॉमिक्स वाचताले. चॉम्स्की मात सतत चिंतन करतालो.
ताणें फक्त भाशाशास्त्रांत क्रांती केली अशें न्हय – पूण राजकी विचारांतूय सत्य सोदपाचो संघर्श सुरू केलो. अमेरिकेन व्हिएतनामांत केल्लें झूज आसूं वा संवसारभर चलपी साम्राज्यवाद आसूं – चॉम्स्कीन ताचेर निर्भयपणान भाश्य, टिप्पणी केली.
लोक म्हणटाले – “तो स्वता अमेरिकन आनी अमेरिकेचीच टिका करता?” पूण चॉम्स्की म्हणटालो – “कोण उलयता ताचे परस सत्य उलयता हें चड म्हत्वाचें.”
आयचे तरणाटे खूब गिन्यान आत्मसात करतात. पूण ते थोडो वेळ थांबून विचार करतात काय? “हें खरेंच काय?”, “हें कोणाच्या फायद्याचें?”, “हातूंत मनीसपण आसा काय?” हे प्रस्न जेन्ना आमी स्वताक विचारतात तेन्नाच खऱ्या अर्थान चिंतन सुरू जाता.
चिंतन आनी सत्य हांचे लागींचें नातें आसा. तुकोबा म्हणटात – चिंतन करपी मनशाक सत्याची वळख जाता. कारण तो खंयच्याच वस्तूच्या वयल्या वयल्या रुपाक फटवना. चॉम्स्की सारकोच चिंतन करपी मनीस सत्तेच्या दबावाक भियेना. तो एकटोच सत्याच्या मार्गाचेर चलूं शकता, पूण फाटीं सरना.
आयच्या संवसारांत आमी म्हायतीन भारावन गेल्यात, पूण शाणपणाची उपासमारी आसा. ती भरपाक चिंतनाची गरज आसा. दरेकल्यान स्वता खातीर थोडो वेळ काडचो, स्वताक विचारचें – “हें खरें काय?” “म्हजी वागणूक खंयच्या सत्याचेर आदारिल्ली आसा?”
– हभप देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
