भांगरभूंय | प्रतिनिधी
जिखप आनी हारप मनीस जीणेतले दोन कोनशे. दिल्लीचे आदले मुख्यमंत्री अरविंद केजरीवाल विधानसभा वेंचणुकेत हारले तेन्ना सेवाव्रती अण्णा हजारे, अॅड. प्रशांत भूषण हांणी तांकां उजरावप सोडलें ना. वाडयल्लें झाड व्हड जातना मोडलें हाचें दूख तांकां जाल्लें, पत्रकारांक तें हांशें अशें दिसलें. खरेपणी तांच्या दोळ्यांत दिसताली तिडक दिल्ली गेल्ल्याची. मनाच्या कोनशाक बांदून दवरिल्ल्यो फाटल्या यादींच्यो पुड्यो सोडटना तांचीं चिंतना आमचीं जालीं. अॅड. सतीश सोनक हांची याद आयली. विद्यार्थी चळवळींतल्यान वकीलच न्हय माहिती हक्क चळवळीमेरेन पावला कणकणी तांच्यो यादी दिसाळ्यांनी शिंपडल्यात. त्यो पुंजायल्यार इंगळे परतून पेट्टले अशें न्हय पूण दिवो, दिवली फुडें वतले जनरेशन नेक्स्ट.
केजरीवालांक याद जायत व्हय गोंय आनी गोंयकारपणाची? गोंयांतल्या कला अकादमीतल्या तांच्या भाशणाची? म्हायती हक्क कायद्याविशीं लोकांक जागोवपाक केजरीवाल हांकां गोंयांत हाडपाचेर आदले मुख्यमंत्री मनोहर पर्रीकार, आमदार दिगंबर कामत एक जाल्ले गोंय विधानसभेंत. कोणाक हाडूया माहिती हक्क कायद्याची माहिती दिवपाक? केजरीवाल, गोंयांत हाडपाची सुचोवणी दिगंबरबाबांन केली, मनोहरबाबांचे मान्यतायेन आम आदमी पार्टीचे मुखेली परशूरामभूंयेत पावले, फाटल्यान सतीश. तांच्या व्याख्यानाक माचयेर मनोहरबाब आशिल्ले.
व्याख्यान सोंपतकीच प्रस्नाच्यो जापो दिवपी केजरीवाल आप कित्याक जिखलीना तें सोदून काडचे ना? १०० च्चे ५०० कोटी मळबांतल्यान हुमऱ्यार उडोवपाची तांक कशी आयली तांकां? ह्या बोटावयली शाय त्या बोटार करपी गुन्यांवकार काल सुटले, आयजय सुटत, फाल्यां सुट्टले? गुन्यांवकार कालचे आनी आतांचे केजरीवालांच्या व्याख्यानाक कशे वतले? थंय आसतले समेस्त.
केजरीवाल हांकां प्रस्न विचारपी, कला अकादमीतल्यान भायर सरतना. तुमी संघ परीवारांतले? हो आमचो तांका प्रस्न. केजरीवाल हांणी तेन्ना जाप दिली ना. पर्रीकारांच्या ओठार हांशें, केजरीवाल्यांचे दोळे, बा्ॅडी लॅंग्वेज तांकां प्रस्न विचारील्ले आवडना अशेंच सांगताली. गोंयच्यान दिल्ली गेले, व्हड जाले, पडले, हनुमान चालीसा म्हणपाक विसरील्ल्यान? संसदेत वाचल्यार?
– सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
