भांगरभूंय | प्रतिनिधी
वर्सा भितर दोनदां गोंयच्या राजभवनांतल्या दरबार हाॅलांत वचपाचो योग आयलो. खंयच्या दरबार हाॅलांत आयलां अशें २०२४ वर्सा गेलें तेन्ना दिसलें. गोवा कोंकणी अकादेमीचो पुरस्कार सुवाळो मात्सो घुस्मटिल्ल्या बंधनांतलो. अंदुं मात्सो तो मेकळोसो दिसलो, फाटल्या रिणांतल्यान मुक्त जाल्ल्याचो मेकळो श्वास घेवपी. राजभवनांतलो हारशांचो मूळ दरबार हाॅल वेगळोच आसा हें नव्या दरबार हाॅलांत वचपी कितल्या जाणांक खबर आसा? व्हडले फॅन (पंखे) हें नव्या दरबार हाॅलाचें खाशेलपण.
तीन दसकांचे मुखेल प्रवाहांतले पत्रकारितेंत राजभवनातलो दरबार हाॅलच न्हय जाल्यार कोनसो, कोनसो भोंविल्ल्याच्यो
यादी सांगल्यार पुस्तक जातलें. मंत्री, राज्यपाल, मुख्यमंत्र्यांचे सोपूत घेवपाचे मध्यानरातीचे सुवाळे, आदले राज्यपाल भानू प्रकाश सिंह हांच्यो राजभवनातल्या हॅलिपॅडार जाल्ल्यो पार्ट्यो, आदले राज्यपाल पी सी अलेक्झांडर आनी तांच्या घरकान्नी वांगडा जेवपाचो खीण, आदले राज्यपाल केदारनाथ साहनी हांच्या आवडींतल्यान फुलिल्लें किरायत्याचें गार्डन, राज्यपालांच्यो मुलाखती सगलेंच बायलायनींतलें. गोंय मुक्तीदिसाच्या राजभवना वयल्या रिसेप्शनातय मंत्री, अधिकाऱ्यां कडेन भासाभास करतना मेळयिल्ली एक्स्क्लुजीव न्यूज.
मंत्री, राज्यपालांचे सोपूतविधी पळोवपी तो दरबार हाॅल ल्हान, गचमुड्डी जाल्यार सोपूत कोण घेता तें कळना. मागीर मुखा वयल्या व्हडल्या हारशांतली प्रतिमा पळोवन खबर दिवप कचेरेंत येवन. कालचे दीस आयज ना, सोपूतविधी जावचे आदीं, उपरांत एका सेकंदा भितर बातमी दिवची पडटा, चुकोय जातात, खिणाचो आस्वादय घेवंक मेळना मागीर वातावरण कितें आशिल्लें त्यो खबरो कशो दिवंक मेळटल्यो? दिल्यारय सत कितलें आसतलें? रंगरंगयाळ्यो असली नकली, कळटा व्हय वाचप्यांक?
नवो दरबार हाॅव कार्यावळीं खातीर, त्या दरबारांतले खेटाखेटीक ह्या हाॅलांत सुवात ना. त्या दरबार हाॅलांत वचपाक राखणे वेवस्थेचें कडक कांकण आसा, नव्याक आसलें तरी तें नांवाक हाची जाणवीकाय अंदू जाली. कोंकणी अकादेमीन २०२६ राजभास दिसाचो मुखेल सुवाळो पणजेंत राजभवना भायर सभाघरांत करचो, मेकळ्या आंगणांत वा आझाद मैदानार जायत व्हय तो?
–सुहासिनी प्रभुगांवकार
98810 99260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
