भांगरभूंय | प्रतिनिधी
चाॅकलेट मागीर ती टाॅफी जावं कॅडबेरी, मंच, किटकेट… ल्हानां पसून व्हडां मेरेन सगल्यांक आवडटा. तातूंत फक्त गोडसाणूच न्हय, तर कजू, बदाम पसून आसतात. म्हारग चाॅकलेटी, तातूंतले तातूंत कॅडबेरी खूबच सुवादीक. ल्हान भुरगें रडलें, खायना, जेविना जाल्यार ताका चाॅकलेट दिली काय तें रोखडेंच शांत जाता. खंयच्याय आनंदाच्या खिणाक, सणा- परबांक, वाडदिसांक मुद्दाम कॅडबेरी डेरी मिल्क चाॅकलेट दितात. मोगी जोडपीं सद्दां चाॅकलेटी खातात. खास करून व्हॅलेंटायन दिसा तीं एकमेकांक कॅडबेरी चाॅकलेट दितात. चलयांक ही कॅडबेरी खूब आवडटा.
सद्दां उठून चाॅकलेट, केक, थंड पेय घेवपी जायते लोक आसात. खूब प्रमाणांत चाॅकलेट खावप आमचे कुडींतल्या हाडां खातीर घातक. आनीकूय खुबशीं दुयेंसां जावं येतात. सद्दांच चाॅकलेट खाल्यार हाडां दुबळीं जातात. तातूंतलें पोशख तत्व आनी खनीज उणें जाता. केन्नाय हाडां मोडटात. चाॅकलेटीन आशिल्लें पलॅवोनेल आनी कॅलशियम हाडां खातीर फायदेशीर आसता. पूण तातूंतलें आॅक्सलेट कॅलशियम आनी साकर ओडून घेता. तें भलायकेक मारक.
सद्दां चाॅकलेट खाल्ल्यान कुडींतलें ग्लुकोजाचें प्रमाण वाडटा. गोडेंमूत जावपाची शक्यताय आसता. मेंदूय बरो काम करीना. ल्हान भुरग्यांक पसून गोडेंमूंत जावपाची भिरांत आसता. जीं भुरगीं चड चाॅकलेट खातात, तांकां गोडेंमूत वा दुसरें कसलें दुयेंस जावं येता. चाॅकलेट आनी जंक फूड ल्हानांच्या मोटसाणेचें कारण आसा. ल्हानपणांत मोटसाण वाडटा. चाॅकलेट चड खाल्यार आंग फुगता. चाॅकलेट खावन पोट भरत बरें न्हय. आठ दिसांनी केन्नाय एक ल्हानशी कॅडबेरी खावप बरें.
प्रत्येक चाॅकलेटीन मात्शें तरी कॅफीन आसता. तें कुडींत वतकूच ल्हान भुरग्यांक रोखडेंच मुतपाक जाता. सदांच चुकनासतना चाॅकलेट खावप ही ताका संवय जावन पडटा. भुरगीं व्यसन लागिल्ले सारकीं अस्वस्थ, चिडचिडीं जातात. तांकां चाॅकलेट मेळना जाल्यार तीं रागार जातात. तांचें अभ्यासाचेर लक्ष लागना. तांकां सदचो पुश्टीक आहार, शीत, हुमण, दाळ, भाजी, तांतीं फ्राय हें कितेंच बरें लागना. तांची भूक मरता. अशक्तपणा येता. भलायकी इबाडटा. तेन्ना मतींत दवरात, चाॅकलेटीचें अतिसेवन म्हणजे एक व्यसन.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
