भांगरभूंय | प्रतिनिधी
भारत २०२७ मेरेन संवसारांतलो दुसरो व्हडलो डेटिंग सेवा बाजार जावपाची शक्यताय
नवी दिल्ली: देशांत डेटिंग ॲपांची लोकप्रियता वाडत आसा. भारत हो संवसारांतल्या सगळ्यांत नेटान वाडपी डेटिंग ॲप मार्केटांतलो एक देश. उद्देगीक सुत्रां प्रमाण देशांत डेटिंग ॲप वापरपी १० कोटी वयर लोक आसात. गुंतवणूक प्लॅटफॉर्म स्मॉलकेसाच्या संशोधनांतल्यान दिसून आयलां की भारत २०२७ मेरेन संवसारांतलें दुसरें व्हडलें डेटिंग सेवा बाजारपेठ जावपाची शक्यताय आसा.
तोखणाय करपासारकी गजाल म्हळ्यार ह्या डेटिंग ॲपांचेर तरणाट्यां वांगडा ४० वर्सां वयर आशिल्ल्या लोकांचो वाटो वाडतूच आसा. व्यभिचार गुन्यांवमुक्त जाले उपरांत लोक लग्ना भायल्या संबंदा खातीरय डेटिंग ॲप वापरतात.
लग्ना भायल्या प्रकरणांचेर लक्ष केंद्रीत करपी
ग्लीडन सारकिल्ल्या डेटिंग ॲपांचेय देशांत ४० लाखां वयर वापरपी आसात. हालींच्या एका अहवाला प्रमाण फाटलीं कांय वर्सां ह्या ॲपांचेर बायलांचो आंकडो अडेज पटींनी वाडला. हो फकत एक प्रवृत्ती न्हय, तर बदलपी समाजीक नेमाचें प्रतीक.
खोल समाजीक बदलाचें संकेत
फोर्ब्स इंडियाच्या अहवाला प्रमाण डेटिंग ॲपांचेर ४० वर्सां वयर लोकांची क्रियाशीलता फकत ‘अफेयर्स’ वा ‘कॅज्युअल डेटिंग’ मेरेन मर्यादीत ना. समाजीक बदल खोलायेन जाल्ल्याचें हें एक लक्षण. लग्न ही अजूनय म्हत्वाची संस्था आसा, पूण ताचे भितरल्या आनी भायल्या संबंदांची व्याख्या बदलत आसा अशें समाजशास्त्रज्ञ म्हणटात. कॉर्पोरेट जिणेंतली खळबळ आनी कुटुंबीक जापसालदारक्यां मदीं भावनीक संबंद नाशिल्ल्यान लोकांक डिजिटल जगांत धुकलतात. इप्सोसाच्या सर्वेक्षणांतल्यान दिसून आयलां की लोक सदांच अफेअर करपाचीं चुकीचीं कारणां दिना.
४० वर्सां वयल्या दादले आनी बायलां खातीर डेटिंगाचे ध्येय वेगवेगळे आसता
४० वर्सां वयल्या दादले आनी बायलांची रोमान्स कडेन पळोवपाची नदर वेगवेगळी आसूं येता. क्वाकक्वाक ह्या डेटिंग ॲपाच्या अहवाला प्रमाण पिरायेच्या ४० वर्सां उपरांतच्यो बायलो भावनीक सुरक्षा दिवपी मोग सोदतात. जे मोकळ्या विचारांचे आसतले, स्वताक उक्तावपाक शकतले, अश्या बायां खातीर भावनीक नदरेन हाजीर आसप गरजेचें आसता. दुसरे कडेन दादलो सहज अश्या संबंदां कडेन आकर्शीत जाता जे विश्वास आनी व्यवस्थापीत करपाक योग्य थारतले. दादले भावनीक शांततेक प्राधान्य दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
