चाळिशींतली सुंदरताय

भांगरभूंय | प्रतिनिधी

फकत अभिनेत्रीनीच चाळिशींत सुंदर तिकतिकीत दिसप? हो अधिकार सर्वसामान्य बायलेक ना? तिणें फकत घरच्यां खातीर झरपाचेंच ?

समाज माध्यमाचेर एक पोस्ट वाचलो. एक बायल समाज माध्यमाचेर चाळिशींतले अभिनेत्रीचो फोटो पळयता. तिचें चाळिशींतली सुंदरताय पळोवन भारावन वता. मागीर आपल्याक हारश्यांत पळयता. मनांत विचार येता, आपूण आनी ती अभिनेत्री एकाच वयाचीं, पूण आपल्या तोंडार दाग पडल्यात, वजन वाडलां, केस पातळ जाल्यात. ती अभिनेत्री कशीच हिच्या मनांतल्यान वचना. तिणें आपल्या धुवेक विचारलें, “मम्मा जाण्टी दिसता गो?” धुवेन तिका अभिनेत्रीचो फोटो पळयतना पळयिल्लें. ताणें म्हणलें, “मम्मा, तूं वोतान सनस्क्रीन लायनासतना आमकां स्कुटरीचेर शाळेंत पायता, हाडूंक येता. कितलेंय पुरो जावन सगलीं न्हिदल्या शिवाय न्हिदना, आमी न्हिदतकच फायच्या नाश्त्याची तयारी करता. तूं कसलींच मल्टिविटामिन्स् घेना, आमी सांडिल्लें जेवण भायर पडटलें म्हूण तेंय जेवता. व्यायाम करपाक तुका फुरसत ना. स्वता खातीर तुका वेळ ना. हें सगळें त्या अभिनेत्रीक जमतलें ?”
हो पोस्ट 70 वर्सां पयलींचो काय हो प्रस्न म्हाका पडलो. खरें म्हणल्यार आपली आवय स्वता कडेन लक्ष दिना हें होलमतकच चलयेन तिका समजावपाची. आवयक स्वता खातीर एक वर दवर, व्यायाम कर, कांतीची काळजी घे अशें सांगपाचें. सेल्फ केअर म्हणल्यार सुवार्थीपणा न्हय.
फकत अभिनेत्रीनीच चाळिशींत सुंदर तिकतिकीत दिसप? हो अधिकार सर्वसामान्य बायलेक ना? तिणें फकत घरच्यां खातीर झरपाचेंच? आपल्या खातीर 24 वरांतल्यान एक वर व्यायाम करप वा आपल्या आवडीक दिवप म्हणल्यार सुवार्थीपणा अशें कंडिशनींग चड करून भारतांत जाता. बायलेचो वेळ तिचो न्हय. तो घोवाचो, भुरग्यांचो. नातरांचो, मांय- मांवाचो, घराचो, पोशिल्ल्या सुण्या-माजरांचोय बी. हांकां सगळ्यांक जाग्यार घालून वेळ खंय उरतलो?
हाचो अर्थ बायलांनीं आपल्यो जापसालदारक्यो सोडप? ना. सगळ्यांत पयलीं आपल्याक आनी घरच्यांक, निदान भुरग्यांक शिस्त लावप. सगळ्यांची चडशी कामां आवयनूच करपाचीं आसनांत. दरेकल्यान आपलीं कामां आपणेंच करचीं. भुरगीं शिकतात. मागीर नोकरी करतात म्हूण कोणाचेर उपकार करिनात. आपलें हांतरूण घडी करप, ऑफिसांचो डबो भरप, उदकाची बाटली भरप अशीं बारीक-सारीक कामां आपणेंच करप आसतात. जेविल्लें ताट, च्याचो कप मोरयेंत दवरप. जाणट्यांक कामांक लावप बरोबर न्हय, पूण अमूक एक पिराय जातकच भुरग्यांक काम दिवपाकूच जाय. कामाची वांटणी घालप. केन्ना- केन्ना भुरगीं आपल्या उमेदीक माजरां, कुत्रीं हाडटात. तांचें करप कोणें? आवयन, चलो जांव चली, दोगांयकूय कामां वांटून घालप हें आवयचें कर्तव्य. आवयन ‘ना’ म्हणपाक शिकपाक जाय.
बायलेन स्वताक एक ‘मनीस’ मानप आनी तशेंच वागप. सगळो भार, सगळो वावर घरच्या बायलेचेर पडटकच ती वया परस जाणटी जावची ना?
एक आदर्श आवय कोण?
सगळें आपल्या माथ्यार घेवन बसता, आपल्या कडेन आडनदर करता, दुसऱ्याक आपल्याचेर निंबून दवरता, भुरग्यांक शिस्त लायना ती आदर्श आवय न्हय. अशें करतना ती घरच्यांक, भुरग्यांक बेशिस्त करता आनी स्वताचें शोशण करून घेता.
पूण समाज कोणाक आदर्श मानपाक सोदता? ती बायल जी आपल्या कडेन लक्ष दिना. तिचो सगळे वेळ कुटुंबाचो. एक अमूक वय जातकच तिणें जाण्टीच दिसपाक जाय. जिका आपले कडेन लक्ष दिवपाक फुरसत नासप हेंच आदर्श जिवीत.
बायलां घर-दार, संवसारा खातीर झिजतात ताचें ओव्हरग्लोरिफिकेशन आतां तरी बंद करात.

संपदा कुंकळकार
9850149319