भांगरभूंय | प्रतिनिधी
-मिझोराम राज्यांतल्या वेंचणुकेचो फाल्यां निकाल
नवी दिल्लीः देशभरांत मध्यप्रदेश, राजस्थान, छत्तीसगढ आनी तेलंगणा सयत मिझोराम ह्या पांच राज्यांच्या निकाला विशीं उमळशीक आसा. एक्झिट पोल्सांत (मतदाना उपरांतचे चांचणेंत) काँग्रेसीक छत्तीसगड आनी तेलंगणांत सत्ता मेळटली, असो अदमास उक्तायला. मध्य प्रदेश आनी राजस्थानांत भाजपा सत्तेंत येतली, असो अदमास आसा. मिझोरामांत सगल्या एक्झीट पोल्सांनी त्रिशंकू स्थितीचो अदमास उक्तायला. आतां आयतारा (3 डिसेंबराक) 4 राज्यांच्याे आनी सोमारा (4 डिसेंबर) मिझोरामचो निकाल लागतलो.
राजस्थान, मध्यप्रदेश, छत्तीसगड, तेलंगणा आनी मिझोराम ह्या पांच राज्यांनी फाटल्या दोन म्हयन्यांत वेंचणुकांची रणधुमाळी चलताली. आरोप-प्रत्यारोप जाले, आस्वासनांची खैरात जाली. महाराष्ट्र, गोंयां सयत हेर राज्यांतले जायते फुडारी ह्या राज्यांनी प्रचारा खातीर गेल्ले. इतलेच न्हय जाल्यार लोकसभा वेंचणुकेची ही रंगीत आशिल्ल्याचेय म्हणटात.
मजगतीं, 30 नोव्हेंबर दिसा मतदान प्रक्रिया जाली. अातां आयज मतमेजणी प्रक्रिया जातली.
मतदान प्रक्रिया जाल्ल्या पांचूय राज्यांनी खर लडतीची आस्त आसा. पांचूय राज्यांनी काँग्रेस आड भाजपा अशी थेट लडत जाल्या. राजस्थानांत आतां मेरेन एकूच सरकार सेगीत 10 वर्सां सत्तेर आसा. ताका लागून भाजपाक अंदूं राजस्थानांत अास्त आसतना दुसरे कडेन मध्य प्रदेशांत 2020 त सत्तानाट्यांत सत्ता वगडायले उपरांत काँग्रेस परतून सत्तेर येवपाक इत्सूक आसा. छत्तीगडांत बघेल सरकारान ग्रामीण वाठारांत, खासा करून अादिवासी आनी शेतकार समाजा खातीर केल्ल्या कामांचो काँग्रेसीक फायदो जातलो काय, हाची उमळशीक आसा.
तेलंगणांत बीआरएसच्या नव्या मॉडेलाक लोक परतून कौल दितले वा काँग्रेस आघाडी घेतली, हाचे कडेनूय राजकी जाणकारांचे लक्ष लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
