भांगरभूंय | प्रतिनिधी
नवी दिल्ली, खबरां संस्था ः 22 एप्रीलाक जम्मू-काश्मीरांतल्या बैसरन, पहलगाम जाल्ल्या आतंकवादी हल्ल्या उपरांत देशभरांत तणावाचें वातावरण निर्माण जालां. भारता आड सेगीत आतंकवादी कारवाय करपी पाकिस्ताना आड भारत सरकार आक्रमक जालां. केंद्र सरकारान भारतांत आयिल्ल्या पाकिस्तानी नागरिकांक 27 एप्रील मेरेन देश सोडपाक सांगिल्लें. काल पाकिस्तानी नागरिकांक दिल्ले मुजतीचो निमाणो दीस आशिल्लो. ह्या काळांत म्हळ्यार 23 एप्रिल ते 27 एप्रिल मेरेन 537 पाकिस्तानी नागरिकांनी भारत सोडलो. हातूंत णव सनदी अधिकारी आशिल्लें. ते सगळे अटारी शिमे वेल्यान पाकिस्तानांत परतून गेले.
ह्या चार दिसांच्या काळांत 850 भारतीय नागरिक पाकिस्तानांतल्यान भारतांत परतून आयल्यात. हे नागरिक लेगीत अटारी शिमे वेल्यान आयलें.
पाकिस्तानांतल्यान 850 भारतीय नागरिक परतले
मजगतीं, एक अधिकारी सयत 116 भारतीय नागरिक आयतारा, 27 एप्रिलाक अटारी-वाघा शिमे वयल्यान पाकिस्तानांतल्यान भारतांत परतले. 26 एप्रिलाक 16 अधिकाऱ्यां सयत 342 भारतीय नागरिक परतून आयलें. 25 एप्रिलाक 287 आनी 24 एप्रिलाक 105 भारतीय नागरिक परतले.
कांय पाकिस्तानी नागरिकांनी हट मार्ग वापरलो
अटारी चौकीचेर तैनात प्रोटोकॉल अधिकारी अरुण महल हांणी सांगलें, 24 ते 27 एप्रील ह्या काळांत वट्ट 537 पाकिस्तानी नागरिक अटारी-वाघा शिमेच्या मार्गान भारतांत परतले. जाल्यार 850 भारतीय नागरिक पाकिस्तान सोडून भारतांत परतले. मजगतीं, कांय पाकिस्तानी नागरिक हवाई मार्गान परतले. भारत आनी पाकिस्तान हांचे मदीं थेट हवाई येरादारी स्थगीत आशिल्ल्यान हे पाकिस्तानी नागरिक सरळ पाकिस्तानांत वच्चें बदला हेर देशांनी देंवून थंयच्यान दुसरे विमानांतल्यान घरा परतले आसूं येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
