भांगरभूंय | प्रतिनिधी
भांगरभूंय । प्रतिनिधी
पेडणेः हरमल पंचायत वाठारांत वरचा वाडा हांगा फाटल्या चार म्हयन्यां सावन उदका पुरवण सारकी जायना. एक दिसा आड दोन वरां तरी उदका पुरवण करपाची लोकांची मागणी आसा. चार दिसां भितर ही वेवस्था केली ना जाल्यार बांदकाम खात्याच्या पेडण्यांतल्या उदका पुरवण कार्यालयाचेर घागर मोर्चा व्हरपाची शिटकावणी थंयच्या बायलांनी दिल्या.
उदका पुरवण करपा खातीर अधिकाऱ्यांची भेट घेवन तशेंच निवेदना दिवंन कांयच उपेग जायना. फकत आस्वासनां मेळटात. लोक आतां बेजारल्यान आनी घागर मोर्चा घेवन वचपाचें तांणी थारयलां अशें थळावी पंच वांगडी रजनी इब्रामपूरकारान सांगलें. पुराय पेडणे तालुक्यांत सध्या उदकाचो उणाव आसा. आमकां एक दिसा आड उदका पुरवण करची अशी आमची मागणी आसा अशें तिणे सांगलें.
गांवांतल्या बांयो नितळ केल्यान मात तातूंत उदक ना. नळाक उदक येता तरी उदकाची बिलां धांडटात. सरकारान 16 हजार लिटर उदक फुटक दितलें अशें जाहीर केल्लें. ताचें किदें जालां हें खबर ना. अशेंय तिणे सांगलें. उदका खातीर सगळें कितें तें करून पळयलें आतां घागर मोर्चा काडल्या उपरांत तरी सरकाराक जाग येता काय किदें तें पळोवपाचें थारायलां अशें पूजा ठाकूर हिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
