भांगरभूंय | प्रतिनिधी
वन नेशन वन रेशन येवजणे वरवीं लाव घेवप शक्य
पणजीः गोंयच्या चार रेशन कार्ड लावार्थ्यांनी वन नेशन वन रेशन येवजणे वरवीं भायल्या तीन राज्यांनी रेशनाचो लाव घेतला. हातूंतले सगल्यांत चड लावार्थी शेजारी राज्य आशिल्ल्या महाराष्ट्रा राज्यांत आसात, अशी म्हायती नागरी पुरवण आनी गिरायक खात्याच्या वरिश्ठ अधिकाऱ्यान दिली.
देशांत खंयसरय आसूं आपल्या राज्यांतल्या रेशन कार्डाचो वापर दुसऱ्या राज्यांत करून रेशन घेवपाक मेकळीक दिवपी वन नेशन वन रेशन येवजण केंद्र सराकारान चालीक लायल्या. हे येवजणे खाला खंयच्याय दुसऱ्या राज्यांतलो मनीस गोंयांत येवन वा गोंयचो मनीस दुसऱ्या राज्यांत वचून आपल्या राज्यांतल्या रेशन कार्डाचो वापर करून रेशन घेवपाक शकता.
फक्त राष्ट्रीय अन्न सुरक्षा येवजणे (एनएफएसए) खाला येवपी एएवाय आनी पीएचएच कार्डा धारकांकच वन नेशन वन रेशनाचो लाव घेवपाक मेळटा. गरिबी रेशे वयर आशिल्ल्या कार्ड धारकांक हे येवजणेचो लाव मेळना. हे खातीर वेगळी नोंदणी करपाची गरज ना. तांणी आपल्या राज्यांतलें कार्ड हाडचे आनी तेच सोसायटींत दाखोवन रेशन घरा घेवन वच्चे अशें अधिकाऱ्यान सांगलें.
गोंया भायल्या राज्यांत लाव घेवपी 4 रेशन कार्ड धारकां मदले 3 कार्ड धारक हे उत्तर गोंयचे आसात जाल्यार एक दक्षीण गोंयचो आसा. उत्तर गोंयांतले 2 कार्ड धारक महाराष्ट्रांत आनी एक रेशन कार्ड धारक केरळ राज्यांत लाव घेता. जाल्यार दक्षीण गोंयचो एक रेशन कार्ड धारक गुजरात राज्यांत लाव घेता.
महाराष्ट्रांत दोन रेशन कार्ड धारकां मदलो एक रेशन कार्ड धारक वडाळा मुंबय आनी दुसरो रेशन कार्ड धारक पालघर जिल्ह्यांत रेशनाचो लाव घेता. जाल्यार केरळ राज्यांत एक कार्ड धारक कोट्टायम जिल्ह्यांत लाव घेता आनी गुजरात राज्यांत एक कार्ड धारक अहमदाबाद जिल्ह्यांत रेशनाचो लाव घेता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
