भांगरभूंय | प्रतिनिधी
नगर नियोजन मंत्र्याच्या बंगल्याचेर मोर्चो व्हेल्ले खातीर नोटीस
युरी, कार्लोस, वेन्झी, क्रूझ ह्या आमदारांचो आस्पाव
वाल्मिकी, मनोज हांचे सयत 1500 लोकां आड कागाळ
भांगरभूंय । प्रतिनिधी
पणजी : नगर नियोजन मंत्री विश्वजीत राणे हांच्या दोना पावलाच्या खाजगी बंगल्याचेर मोर्चो व्हेल्ल्या प्रकरणांत पणजी पुलिसांनी विरोधी पक्ष फुडारी युरी आलेमांव, आमदार कार्लोस फेरेरा, वेन्झी व्हिएगश, क्रूझ सिल्वा हांचे सयत आरजीपी अध्यक्ष मनोज परब, आप प्रदेशाध्यक्ष वाल्मिकी नायक हांचे सयत 1200 ते 1500 लोकां आड एफआयआर दाखल देल्या. हातूंत बेकायदो आंदोलन करप, मंत्री राणे हांच्या बंगल्याचेर मोर्चो व्हरप, रस्तो आडावन 8 वरां येरादारीक आडखळ करप, अशीं कारणां दिल्यांत.
फाटल्या शेनवारा आमदार विरेश बोरकार हांणी सांत आंद्रे मतदारसंघांतलो कलम 39 अ प्रमाण प्रस्तावीत झोन बदल करपाची मागणी केल्ली. तांणी पाळे शिरदोनच्या लोकां सयत खात्याच्या पाटो वयल्या कार्यालयांत ठिय्या आंदोलन केल्लें. ह्या वेळार पुलिसांनी आमदार बोरकार हांकां कार्यालयांतल्यान जबरदस्सतीन भायर काडिल्ले. ते उपरांत बोरकार हांणी पली मागणी पुराय जाय मेरेन आमरण उपोशण करपाचो निर्णय घेतिल्लो. हाका काँग्रेस आनी आपच्या आमदारांनी तेंको दिल्लो.
सोमारा 23 फेब्रुवारीक नगर नियोजन कायद्यांतलें कलम 39 (ए) रद्द करचे खातीर आझाद मैदान ते राणे हांचो बंगलो असो मोर्चो काडिल्लो. आंदोलक खूबशीं वरां राणे हांच्या बंगल्या मुखार ठिय्या मारून बशिल्ले. बुधवारा जाल्ले भाजपाच्या कोअर समितीचे बसकेंत हो विशय आयिल्लो. ते उपरांत मुख्यमंत्री डॉ. प्रमोद सावंत हांणी मंत्र्याच्या घरांचेर मोर्चो व्हरपाचो निर्णय चुकीचो आशिल्ल्याचें सांगिल्लें. आंदोलनांत वांटेकार आशिल्ल्यांचेर कारवाय करतले, अशी शिटकावणीय तांणी दिल्ली.
ते उपरांत आंदोलनांत वांटो घेतिल्ल्यांक नोटिसो येवपाक लागल्यात. तातूंत तांकां पणजी पुलीस स्टेशन, ताळगांव पुलीस आवट पोस्ट वा दोना पावला पुलीस आवट पोस्टार येवन मेळपाचे आदेश नोटिसे वरवीं दिल्यात. हे संबंदांत आप प्रदेशाध्यक्ष वाल्मिकी नायक हांणी म्हणलें, भाजप सरकार विरोधी आमदारांच्या फाटल्यान लागला. अशें आसलें तरीय, लोक आमच्या वांगडा आशिल्ल्यान आमकां फरक पडना. ही एफआयआर म्हणल्यार आमचे खातीर अभिमानाची गजाल आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
