भांगरभूंय | प्रतिनिधी
पणजे जातलीं 40 नवीं चार्जींग स्टेशनां
भांगरभूंय । प्रतिनिधी
पणजीः चार्जींग स्टेशनां उबारून चलोवपाच्या इत्सा प्रस्तावांक उद्देजक तशेंच एजन्सी कडल्यान प्रतिसाद नाशिल्ल्यान भौशीक वाठारांतल्या कंपन्यां कडल्यान (पीएसयू) चार्जींग स्टेशनां उबारपाचो निर्णय सरकारान घेतला. पणजे नवीं 40 चार्जींग स्टेशनां जातलीं. हे भायर इंडियन ऑयल सारक्या भौशीक वाठारांतल्या कंपनीं कडल्यान गोंयांत 33 चार्जींग स्टेशनां उबारपाचो प्रस्ताव आसा.
आमदार केदार नायक हांच्या तारांकीत प्रस्नाचेर अक्षय उर्जा मंत्री सुदिन ढवळीकार हांणी ही लेखी म्हायती दिल्या. 25 नोव्हेंबर 2022 दिसा खात्यान चार्जींग स्टेशनां उबारून चलोवप वा हस्तांतरण करपा खातीर गेडा इत्सा प्रस्ताव (इओआय) जारी केल्ले. ह्या इत्सा प्रस्तावांक प्रतिसाद मेळ्ळो ना. हाका लागून सरकारान भौशीक वाठारांतल्या कंपन्यांक चार्जींग स्टेशनां उबारपाचें कंत्राट दिलां. पुराय राज्यांत भौशीक वाठारांतल्या कंपनीं कडल्यान 33 चार्जींग स्टेशनां उबारतले. गोंयांत सध्या 38 चार्जींग स्टेशनां आसात. पर्वरे, पणजी, सांखळे, काणकोणां, ताळगांवां, जुवारीनगर, फोंड्यां, कळंगूटे, मोलें, मडगांवां, सुकूर वाठारांत चार्जींग स्टेशनां आसात. तीं गेडा, बीपीसीएल, एचपीसीएल आनी टाटा पावर ह्या कंपनींचीं आसात, अशी म्हायती लेखी जापेंत आसा.
कंपनींचीं प्रस्तावीत चार्जींग स्टेशनां
महाप्रीत (10) : पणजी बस स्टँड, म्हापशें मामलेदार ऑफीस, पर्वरे शिक्षण खातें, पर्वरे ट्रेनिंग कॉलेज, दिवचल बस स्टॅण्ड, अस्नोडें बस स्टँड, दिवचल पुलीस स्टेशन, सांखळे बस स्टँड, होंडा बस स्टँड
आयोसीएल (5) : मडगांव बस स्टँड, वास्को बस स्टॅण्ड, मडगांव एसजीपीडीए मार्केट, मडगांव जिल्होधिकारी कार्यालय, वेर्णा उद्देगीक वसणूक सीईएसएल (15) : ईडीसी पाटो – पणजी, पाटो पासपोर्ट कार्यालय, पणजी म्युनिसिपल गार्डन, पणजी बीएसएनएल कार्यालय, पोरणें गोंय चर्च, कुडचडें बस स्टॅण्ड, कुंकळ्ळी बस स्टॅण्ड, काणकोण बस स्टॅण्ड, काकोडा आयटीआय, शिरोडें बस स्टॅण्ड, वाळपय बस स्टॅण्ड, माशेल बस स्टॅण्ड, फोंडें बस स्टॅण्ड, सांखळे भलायकी केंद्र, बेती न्हंय येरादारी खातें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
