भांगरभूंय | प्रतिनिधी
मुख्यमंत्रीः गोंयच्यो दोनूय सुवातो भाजपाकूच
भांगरभूंय । प्रतिनिधी
दिवचलः सबका साथ सबका विकास ही मोदींची घोशणा देशान उखलून धरल्या. परतून एकदां पुराय देशांत प्रधानमंत्री नरेंद्र मोदी हांचें ल्हार आयलां, ताची प्रचिती कालच्या एक्झीट पोलांत दिसून आयल्या. प्रत्यक्षांत 4 जूनाक ‘अबका बार 400 पार’ ही घोशणा पुराय तरेन येसस्वी जातली, अशी खात्री मुख्यमंत्री डॉ. प्रमोद सावंत हांणी उक्तायल्या.
एक्झीट पोलाच्या संबंदांत देशांत भाजपाक 375 ते 400 मेरेन सुवातो मेळटल्यो, असो अदमास भोवतेक सगळ्याच प्रसार माध्यमांनी दिला. गोंयांतली सुवात 1-1 अशी दाखयिल्ली आसली तरीय दोनूय सुवातांचेर भाजपा जिखतलो, हे विशीं कसलोच दुबाव ना, अशें मुख्यमंत्री डॉ. सावंत हांणी सांगलें.
दक्षीण गोंयांत पुराय गांवगिऱ्या वाठारांनी लोकांमदीं सुमारा भायर उमेद दिसून आयल्या. 75 टक्के परस अदीक मतदान जाल्ल्यान भाजपा खातीर ती जमेची बाजू आसा. भाजप दक्षीण गोंयांत लेगीत 25 हजारां परस अदीक मतांची आघाडी घेतलो, असो विस्वास मुख्यमंत्र्यान उक्तायला.
अरुणाचल प्रदेशांत भाजपाक स्पश्ट भोवमत मेळ्ळां, काँग्रेसीचो धूप जाला. अरुणाचल प्रदेशाच्या निकाला वयल्यान देशांत भाजप आनी मोदी हांकांच पसंती आशिल्ल्याचें स्पश्ट जालां आनी ताची प्रचिती 4 जूनाक 400 पारच्या माध्यमांतल्यान येतली, अशें मुख्यमंत्री डॉ. सावंत हांणी म्हणलां. अरुणाचल प्रदेशांत हे पद्दतीन प्रचार रणनिती आंखिल्ली आनी हें व्हड जैत मेळ्ळें, ते खातीर मुख्यमंत्री डॉ. सावंत हांणी प्रधानमंत्री नरेंद्र मोदी, अमीत शहा तशेंच अरुणाचल प्रदेश प्रदेशाचे भाजप फुडारी, प्रदेशाध्यक्ष हांकां खाशेली परबीं भेटयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
