भांगरभूंय | प्रतिनिधी
डेहराडून, खबरां संस्था ः उत्तराखंडाच्या चारधाम यात्रे वेळार गंगोत्री- यमुनोत्री हांगाय भक्तांची व्हड गर्दी जमल्या. दोनूय धामांतल्यान हरिद्वाराचे वटेन वचत जाल्यार सध्या बरकोट मेरेन म्हणल्यार 170 किलोमिटर मेरेन येरादारीची कोयंडी जाल्या. हांगाच्यान उत्तरकाशीक 30 किमीचो एकूच मार्ग आसा. हाका लागून वयल्यान येवपी गाडयां खातीर वाट मेकळीं करुन दितात. देवळा वटेन वचपी वाहनांक 20- 25 वरां उपरांत वळोवपाचें काम सुरू आसा. हातूंतच यमुनोत्रीक वचपी 10 भक्तांक रस्त्यारच मरण आयलां. पूण हांचे परस केदारनाथ, बद्रीनाथ रस्त्यांचेर गर्दी उणी आसा. हाका लागून मंगळारा 23 हजारां परस चड भक्तांक सहजतायेन दर्शन घेवपाक मेळ्ळें.
4 दिसांत 1.30 लाख लोक
पौराणीक ग्रंथां प्रमाण उत्तराखंडांतल्या चारधाम यात्रेची 1200 वर्सांची परंपरा आसा. पूण पयलेच खेपे भक्तांची इतली गर्दी जाल्या. फाटल्या वर्सा 22 एप्रीलाक गंगोत्री, यमुनोत्रीचे, केदारनाथचे 25 एप्रीलाक आनी 27 एप्रीलाक बद्रीनाथची दारां उक्तीं जालीं. हे खेपे चार दिसांत 1.30 लाखां परस चड भक्त आयले. जाल्यार फाटल्या वर्सा 2023 त 16 दिसांत इतले भक्त आयिल्ले.
मजगतीं, नाशिक सावन आयिल्ल्या एका भक्तान म्हणलें, आमी गंगोत्रीक वचपाक आशिल्ले. पूण कितलेशेच वरां येरादारींत आडकून उरले. देखून आमी गंगोत्री यात्रा रद्द करून आतां केदारनाथ धामाक वतात. जाल्यार महाराष्ट्रांतल्यान आयिल्ल्या विनय देशमुख हांणी सांगलें, 14 वरां गंगोत्रीक वचपाचो यत्न करता, पूण कितलो तेंप जालो येरादारींत आडकून उरला. लागीं गांव वा धाबो ना. तशेंच हांगा सगलेंच म्हारग मेळटा. 50 रुपयांक पिवपाच्या उदकाची बाटली मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
