भांगरभूंय | प्रतिनिधी
डेहराडून, खबरां संस्था ः उत्तराखंडांत 30 एप्रील सावन सुरू जावपी चारधाम यात्रे वेळार युट्युबर आनी व्हिडियो रील्स करप्यांक प्रवेश दिवचे नात. केदारनाथ- बद्रीनाथच्या पंडा समाजान हो निर्णय घेतलां. ह्या वेळार देवळाच्या वाठारांत अशा लोकांक प्रवेश मेळचो ना अशें तांणी थारायलें. हे विशीं प्रशासनाकय म्हायती दिल्या. केदारनाथ सभेंचे अध्यक्ष राजकुमार तिवारी हांणी सांगलें, फाटल्या वर्सा रील तयार करप्यांक लागून खूब गोंदळ जालो. केदारनाथ धाम हांगाच्या ढोलाचो आवाज फकत रील तयार करपा खातीर वापरताले. ह्या आवाजाक लागून पयले 10 ते 12 दीस शिवालिक दोंगरांत बोवाळ जालो. देखून अंदूं कॅमेरा सुरू करपाक लेगीत मेळचो ना.
10 सुवातींनी विसव थळांची वेवस्था
चारधाम यात्रे वेळार वायट हवामान आनी प्रतिकूल परिस्थितींत यात्रेकरुंक रावपा खातीर 10 सुवातींनी विसव घेवपाचे वाठार तयार करतात. हरिद्वार, ऋषिकेश, ब्यासी, श्रीनगर, रुद्रप्रयाग, सोनप्रयाग, हरबटपूर, विकासनगर, बडकोट, भटवाडी हांगा थळी आसतली. उदक, शौचालय, रातीं रावपा खातीर खाटी, वखदां आनी जेवणाची आपत्कालीन वेवस्थाय आसतली. पुराय प्रवास मार्ग 10 -10 किलोमीटर ह्या क्षेत्रांनी विभागला. दरेका क्षेत्रांत 6 पुलीस कर्मचारी आसतले.
9 लाख नोंदणी, केदारनाथा खातीर सगळ्यांत चड
अंदूं 6 दिसांत 9 लाख भक्तांनी यात्रे खातीर नोंदणी केल्या. केदारनाथ धामाक चडांत चड 2.75 लाख, बद्रीनाथाक 2.24 लाख, यमुनोत्रीक 1.34 लाख, गंगोत्रीक 1.38 लाख आनी हेमकुंट साहिबाक 8 हजारां परस चड भक्त येतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
