भांगरभूंय | प्रतिनिधी
नवी दिल्ली, खबरां संस्था: चायल्ड पोर्नोग्राफी विशीं सर्वोच्च न्यायालयान एक म्हत्वाचो निर्णय दिला. चायल्ड पॉर्नोग्राफी डावनलोड करप वा पळोवप हें पॉक्सो कायद्या खाला गुन्यांव, असो निर्णय सर्वोच्च न्यायालयान घेतला. चायल्ड पोर्नोग्राफी विशीं मद्रास हायकोर्टान ह्यान पयलीं दिल्लो निर्णय सर्वोच्च न्यायालयान रद्द करून हो निर्णय दिला. हो निर्णय दितना सर्वोच्च न्यायालयान कांय म्हत्वाचे निर्देशूय दिल्यात.
चायल्ड पोर्नोग्राफी डावनलोड करप वा चायल्ड पोर्नोग्राफी पळोवप हो गुन्यांव नाशिल्ल्याचो निर्णय मद्रास उच्च न्यायालयान दिल्लो. मात, मद्रास उच्च न्यायालयाचो हो निर्णय भायर मारून सर्वोच्च न्यायालयान आयज (२३ सप्टेंबर) चायल्ड पोर्नोग्राफी पळोवप हो गुन्यांव आशिल्ल्याचो निर्णय घेतला. ताका लागून आतां चायल्ड पोर्नोग्राफी डावनलोड करप आनी पळोवप गुन्यांव थारतलो.
खंयच्याच न्यायालयांनी चायल्ड पॉर्नोग्राफी अशे शब्द वापरचे न्हय
सर्वोच्च न्यायालयाचे सरन्यायाधीश डी वाय चंद्रचूड आनी न्यायमूर्ती जे बी पारडीवाला हांच्या खंडपीठान हो निर्णय दिला. देशांतल्या खंयच्याच न्यायालयांनी ‘चायल्ड पॉर्नोग्राफी’ अशे शब्द वापरचे न्हय, अशे निर्देशूय सर्वोच्च न्यायालयान दिल्यात.
देशांतल्या सगळ्या न्यायालयांनी ‘चायल्ड पॉर्नोग्राफी’ शब्द वापरचो न्हय. ताचे बदला ‘बाल लैंगीक शोशण आनी गैर वागणूक सामग्री’ अशे शब्द वापरपाचे आदेश दिले. तशेंच ‘बाल लैंगीक शोशण आनी गैर वागणूक सामग्री’ अशे शब्द वापरपा खातीर पॉक्सो कायद्यांत सुधारणा करप गरजेचें आशिल्ल्याचेंय न्यायालयान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
