भांगरभूंय | प्रतिनिधी
नवी दिल्ली, खबरां संस्था: दर्यावेलो वेपार तशेंच झुजांचे नदरेन म्हत्वाचें आशिल्ल्या इराणांतल्या चाबहार बंदराचें संचालन करपाक भारतान सोमारा ता. १४ मे दिसा १० वर्सांच्या कराराचेर सय केल्या. ह्या बंदरा वरवीं भारताचो मध्य आशिया कडेन वेपार वाडोवपाक मजत जातली. तशेंच चाबहार वरवीं भारतान पयलेच फावट विदेशी बंदराचें वेवस्थापन हातांत घेतलां. मात अमेरिकेक भारताचो करार आवडूंक ना. करार केल्या उपरांत कांय वरांनी अमेरिकेन इराणा कडेन वेव्हार करप्यांक निर्बंधाच्या कारवायेक तोंड दिवचें पडटलें अशी शिटकावणी दिल्या.
इराणान इस्रायलाचेर हल्लो केल्या उपरांत अमेरिकेन कांय दिसां आदीं इराणच्या मनीसबळ नाशिल्ल्या विमान वाहनांच्या उत्पादनाक लक्ष्य केल्लें. ताचे उपरांत सावन अमेरिका इराणा कडेन वेव्हार करपी देशांक निर्बंधाची धमकी दिता.
यूएस स्टेट डिपार्टमेंटचे म्हणयारे वेदांत पटेल हांणी पत्रकार परिशदेंत हे विशीं विचारिल्ल्या प्रस्नाक जाप दितना सांगलें, इराण आनी भारत हांचे मदीं जाल्ल्या चाबहार बंदराच्या कराराची म्हायती आमकां मेळ्ळ्या. चाबहार बंदराचो करार आनी इराणा कडेन द्विपक्षीय संबंध हे विशीं भारतान आपलें परराष्ट्र धोरण जाहीर करचें. अमेरिके विशीं उलोवपाचें जाल्यार आमी इराणाचेर निर्बंध घातल्या आनी ताचेर फुडेंय ठाम रावतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
