भांगरभूंय | प्रतिनिधी
अनवळख्यां आड गुन्यांव; उजाे आटापांत आयिल्ल्याचें रान अधिकाऱ्यांचें सांगणें
काणकोण: काणकोण म्हालांतल्या चापोली धरणा कुशीक कर्पा दोंगराक उजो लायिल्ल्या प्रकरणांत काणकोण रान विभागान अनवळखी मनशां आड गुन्यांव नोंद केला. विभागीय रान अधिकारी आनंद मेस्त्री फुडलो तपास करतात. सद्या उजो आटापांत आयिल्ल्याचें मेस्त्री हांणी सांगलें.
उजो लागिल्ल्याची म्हायती मेळटकूच जैव विविधताय संस्थेच्या पदाधिकाऱ्यांनी घडणूक थळार भेट दिवन जैव विविधताय मंडळाच्या वरिश्ठांक हाची म्हायती दिली.
आयतारा सांजवेळा चापोली कर्पा दोंगराक उजो लागिल्लो. काणकोण रान विभागाचे सुमार 12 रक्षकांनी उजो हेर कडेन पातळचो न्हय हे खातीर सुको कोयर कुशीक काडलो. तरिपूण उजो हेर कडेन पातळ्ळो.
उजो लागिल्ल्याची म्हायती उजो पालोवपी दळाक दिली. दळाचे सात जवान आनी रान खात्याचे 12 रक्षक मेळून 19 जाणांनी फांतोडेर 2.30 वरांचेर उज्याचेर नियंत्रण मेळयिल्ल्याचें उजो पालोवपी दळाचे दिलेश गांवकार हांणी सांगलें.
श्रीस्थळ जैवविविधताय संस्थेचे अध्यक्ष विनय तुबकी, नवज्योत नायक गांवकार, तेजस नायक गांवकार आनी शिरीष पै हांणी घडणूक थळाक भेट दिवन पळोवणी केली. सुमार 20 हजार चौमि सुवातेंत हो उजो लागिल्लो अशें रान अधिकारी मेस्त्री हांणी सांगलें.
रानवटी कोंडे (कळकी) ह्या उज्यांत व्हड प्रमाणांत लासून गेल्ल्याचें जैव विवीधताय संस्थेचे अध्यक्ष विनय तुबकी हांणी सांगलें. हे संबंदी जैवविविधताय मंडळाचे वरिश्ठ अधिकारी डॉ. प्रदीप सरमोकादम हांकां म्हायती दिल्ल्याचें तुबकी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
