चांद्रयान-3 चो धर्तरेचे कक्षे भायलो प्रवास सुरू

भांगरभूंय | प्रतिनिधी

5 ऑगस्टाक चंद्राचे पयले कक्षेंत

भांगरभूंय । खबरां संस्था
सध्या चांद्रयान- 3 चंद्राचे दिकेन वता. ताच्या एका दिसा आदीं ताणें पृथ्वीची कक्षा सोडली आनी ‘ट्रान्स लुनर ट्रॅजेक्टोरीं’त प्रवेश केला. आतां मेरेन चांद्रयान पृथ्वीचे पांचवे कक्षेंत भोंवता. आतां तें चंद्रा वटेन वेगान वता. इस्रो 5 ऑगस्टाक चंद्राचे पयले कक्षेंत यानाक इंजेक्ट करूंक शकता.
चांद्रयान-3 ही भारताची म्हत्वाची मोहीम. यान सुखरूप देंवलें जाल्यार भारत चंद्राच्या पृश्ठभागाचेर यानाचें ‘सॉफ्ट लँडींग’ करपी चवथो देश थारतलो. आतां मेरेन अमेरिका, रशिया आनी चिनान हो पराक्रम केला. चांद्रयान- 3 हें 14 जुलयाक श्री हरिकोटाच्या सतीश धवन अंतराळ केंद्रांतल्यान प्रक्षेपीत केल्लें. तें 23 ऑगस्टाक चंद्राचेर सॉफ्ट लँडींग करतलें.

फुडलो प्रवास कसो आसतलो

चंद्रयान-3 आतां प्रवासाच्या फुडल्या टप्प्यांत आसा, सध्या तें धर्तरेक सोडून चंद्राचे कक्षेंत वचपाक लागलां. इस्रोच्या म्हणण्या प्रमाण, तें 5 ऑगस्टाक पयले चंद्र कक्षेंत पावतलें. सध्या धर्तरेक भोंवताडे घालपी चंद्रयान 15 ऑगस्ट सावन चंद्राक भोंवताडे घालतलें. मागीर एक- एक कक्षा पार करून चंद्राचे मुखेल कक्षेंत पावतलें.

उपरांत कितें जातलें?

इस्रोचे म्हायती प्रमाण, 5 ऑगस्टाक चांद्रयान-3 चंद्राचे पयले कक्षेंत पावतलें. उपरांत 9 ऑगस्टाक फुडले कक्षेत, 14, 16 ऑगस्ट आनी 17 ऑगस्टाक निमाण्या थळाचेर पावतलें. १७ वेर चांद्रयान प्रोपल्शन मॉड्यूल सोडटलें आनी लँडिंगा खातीर पुरायेन तयारी सुरू करतलें. म्हळ्यार ल्हव ल्हव वेग उणो करीत तें चंद्राचे जमनी लागीं वतलें आनी 23 ऑगस्टाक सांजेवेळार 5.47 वरांचेर चंद्रार सॉफ्ट लँडींग करतलें.

लँडर आनी रोव्हर चंद्राचेर देंवतले

23 ऑगस्टाक चंद्राचेर सॉफ्ट लँडींग करपाची जापसालदारकी विक्रम लँडरची आसतली. चंद्राचेर पावपाचें काम प्रोपल्शन मॉड्यूला वरवीं करतले, जें 17 ऑगस्टाक ताचे पसून वेगळें करतले. लँडर विक्रम फुडलें काम सांबाळटलें आनी रोव्हर प्रज्ञानाक चंद्राच्या पृश्ठभागार सुरक्षितपणान घेवन वतलें. उपरांत रोव्हर प्रज्ञान लँडरा पसून वेगळें जातलें आनी चंद्राच्या पृश्ठभागाची म्हत्वाची म्हायती एकठांय कतरलें.