‘चांद्रयान-3’न धाडले चंद्राचे फोटो
भांगरभूंय | प्रतिनिधी
नवी दिल्ली: चांद्रयान- 3 न चंद्राचे कक्षेंत प्रवेश केल्या उपरांत इस्रोन एक व्हिडीओ जारी केलो. तातूंत ‘चांद्रयान-3’ न काडिल्ले चंद्राचे फोटो दिसतात.
इस्रोन व्हिडीओ शेअर करीत म्हणलां, व्हिडीओ वरवीं जारी केल्ल्या फोटवांत चंद्र निळ्या- पांचव्या रंगांत दिसता. चंद्राचेर खुबशीं फोंडकुलांय दिसतात. आयज चांद्रयान चंद्राच्या आनीक लागीं वतलें. चांद्रयान सध्या चंद्राच्या पृश्ठभागा पसून 4313 किमी अंतराचेर आसा.
4 जुलयाक चांद्रयान-3 न धर्तरी आनी चंद्र हांचे मदलें दोन तृतीयांश परस चड अंतर हुपिल्लें. एका दिसा उपरांत म्हळ्यार 5 ऑगस्टाक हें यान चंद्राच्या कक्षेंत दाखल जालें. चांद्रयान- 3 चें प्रक्षेपण 14 जुलयाक श्रीहरिकोटाच्या सतीश धवन अंतराळ केंद्रांतल्यान जाल्लें.
‘चांद्रयान-3’ 9 ऑगस्टाक दनपारच्या 2 वरांचेर चंद्राचे तिसरे कक्षेंत प्रवेश करतलें. उपरांत 14 ऑगस्टाक चवथ्या आनी 16 ऑगस्टाक पांचवे कक्षेंत पावतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
