भांगरभूंय | प्रतिनिधी
पेडणें रान खात्याच्या कर्मचाऱ्यांची तोखणायेची कामगिरी
पेडणें: पेडणें वाठारांत व्हड प्रमाणांत गव्या रेड्यांनी खवदळ घाल्लो आसून मंगळारा रातीं चांदेल हाळी वाठारांतल्या तिळारीच्या कानालांत पडिल्ल्या 9 ल्हान व्हड गव्या रेड्यांक पेडणें रान खात्याच्या कर्मचाऱ्यांनी जिवदान दिलें. ह्या गव्या रेड्यांचेर कायमची उपाय येवजण करपाची मागणी शेतकार करीत आसात.
पेडणें म्हालांतल्या गांवांनी व्हड प्रमाणांत रानां आसून त्या रानांनी गव्या रेड्यांची संख्या दिसानदीस वाडत आसा. म्हालांतल्या चांदेल, हाळी, कासारवर्णें, खुटवळ, तळर्ण, हळर्ण आनी इब्रामपूर बी गांवांनी गव्या रेड्यांची संख्या व्हड प्रमाणांत आसा. हे गवे रेडे रातच्या वेळार शेतांत येवन शेतांचें लुकसाण करतात. ताका लागून शेकारांनी केल्ले कश्ट फुकट वचून तांकां अर्थीक लुकसाणेक तोंड दिवचें पडटा.
फाटल्या खूबशा वर्सां सावन गव्या रेड्यांचो बंदोबस्त करपाची शेतकारांची मागणी आसा. पूण सरकार आनी रान खातें हाचे कडेन हेतुपुरस्सर आडनदर करतात असो आरोप शेतकार करतात.
सदचे प्रमाण हे गवे रडे पंगडांनी रातच्या वेळार रानांतल्या सकयल देंवून उदक आनी खावपाच्या सोदांत आसतना मंगळारा रातीं चांदेल हाळी वाठारांत आशिल्ल्या तिळारीच्या मुखेल कानालांत 9 गवे रेडे पडले. हातूंत एक वर्सां सावन ते व्हड अशा वट्ट 9 गव्या रेड्यांचो आस्पाव आशिल्लो.
ही खबर बुधवारा पेडणेंच्या रान खात्याक मेळ्ळे उपरांत अधिकारी हरीश महाले, सेबेस्त्यांव रॉड्रिग्ज, रावंड फॉरेस्टर अनील केरकार, राजू खरपालकार आनी रान कर्मचारी विशाल गवस, संदीप नारोजी, स्नेहल साळगांवकार, जितेंद्र, अविनाश, समीर, सिद्धेश, विशाल आनी अर्जून तशेंच पेडणें आनी केरी रेस्क्यू विभागांतले विराज परवार, बाबलो, चेतन, अमरेश, शाहू हांणी व्हड कश्टान गव्या रेड्यांक जिवदान दिलें. हे खातीर रान कर्मचार्यांची सगली कडेन तोखणाय जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
