भांगरभूंय | प्रतिनिधी
पेडणें: पेडणें भाजप मंडळ अध्यक्ष तशेंच चांदेल- हंसापूर सरपंच तुळशीदास गांवस हांचे आड रुचिरा मळीक, बाळा शेटकार आनी प्रजय मळीक ह्या तीन पंच वांगड्यांनी अविस्वास थाराव दाखल केला.
दोन वर्सां आदीं चांदेल हंसापूर पंचायत मंडळ स्थापन जाले उपरांत पंचायत मंडळांनी आमदार प्रवीण आर्लेकार हांची भेट घेतिल्ली. तेन्ना पयल्या अडेज वर्सा खातीर तुळशीदास गांवस हांची सरपंच म्हणून निवड करपाची कबलात जाल्ली. ते प्रमाण दोन वर्सां आदीं गांवस हांची सरपंच म्हणून निवड केली. आजूनय स म्हयने आसतना १२ तारखेर तीन पंच वांगड्यांनी तांचेर अविस्वास थाराव हाडलो.
तुळशीदास गांवस हे पेडणें भाजप मंडळाचे अध्यक्ष. ते आमदार प्रवीण आर्लेकार हांचे समर्थक अशें सगळे समजताले. मात हालीं दोगांय मदीं दरी निर्माण जाले उपरांत आनी सनबर्न महोत्सवाच्या निमतान दोन गट निर्माण जाल्यात. हो अविस्वास थाराव हाडपाक सनबर्न विशय आसपाक शकता, सध्या अशी पेडणें म्हालांत नेटान चर्चा सुरू आसा.
सनबर्न महोत्सवाच्या आड आमदार प्रवीण आर्लेकार हांणी पेडणे मतदार संघांतले सरपंच, उपसरपंच, पंच वांगडी हांची बसका आयोजीत केल्ली. ते बसकेक चांदेल हंसापूर सरपंच तुळशीदास गांवस हजर रावूंक नाशिल्ल्यान ताची तिडक ह्या अविस्वास थारावाचेर काडिल्ल्याची शक्यताय आसा. तुळशीदास गांवस हे मुख्यमंत्री प्रमोद सावंत हांच्या संपर्कांत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
