भांगरभूंय | प्रतिनिधी
पंच वांगड्या वांगडा बावन्सर आयिल्ल्यान वातावरण तापलेंपेडणेंः चांदेल-हंसापूर सरपंच तुळशीदास गांवस हांचेर उपसरपंच रूचीता मळीक. पंच बाळा शेटकार, प्रजय मळीक हांणी अविस्वास थाराव हाडिल्लो. त्या अविस्वास थारावाचेर 20 वेर पंचायत कार्यालयांत विशेश बसका आपयिल्ली. त्या वेळार उपसरपंच रुचीरा मळीक आनी पंच प्रजय मळीक हजर आशिल्ले. पण पंच बाळा शेटकार हे चार-पांच बावन्सराचे हाजिरेंत एका वाहनांतल्यान पंचायत कार्यालयांत आयिल्ल्यान ग्रामस्थ तिडकले. ग्रामस्थांनी बाळा शेटकार आनी पंच वांगड्यांक पंचायत कार्यालयांत आडावन ताका वाहनांतल्यान परस्पर घरा व्हेले. ताका लागून अविस्वास थाराव शेळेलो.
उपसरपंच रचीरा मळीक आनी प्रजय मळीक हांणी सांगलें, आमचो सरपंच तुळशीदास गांवस हांचेर कसलोच राग ना. आमदार प्रवीण आर्लेकार हांच्या सांगपा वयल्यान अविस्वास थराव हाडिल्ल्याचे स्पश्टीकरण तांणी दिले.
मजगतीं, सरपंच तुळशीदास गांवस हांचे आड फाटल्या 10 दिसां पयलीं अविस्वास थाराव हाडिल्लो. त्या तिगांय पंच वांगड्यांनी तातूंत उपसरपंच रूचिरा मळीक, पंच प्रजय मळीक आनी बाळा शेटकार हांणी गोंय मुक्तीदिसाच्या तिरंगो हुबोवपाचे कार्यावळीचेर बहिश्कार घातिल्लो. आनी हे तिगूय पंच वांगडी गांवांत हजर नाशिल्ले. पूण 20 वेर अविस्वास थारावाचेर चर्चा आनी खासा पंचायत मंडळाची बसका आयोजीत केली, तेन्ना एका वाहनांतल्यान तिगूय पंच वांगडी पंचायत कार्यालयांत आयले. पूण बाळा शेटकार ह्या पंच वांगड्या वांगडा चार-पांच बावन्सर आशिल्ल्यान आनी ताचे पयलीं तिगूय पंच कारणाविणें सरपंच तुळशीदास गांवस हांचेर अविस्वास हाडिल्ल्यान व्हड संख्येन ग्रामस्थ हजर आशिल्ले. ग्रामस्थांनी आमच्या गांवांत बावन्सर आयिल्ल्यान आनी तांचे वांगडा पंच वांगडी अाशिल्ल्यान तिडक उक्तावन बावंन्सराच्या ताब्यांतल्यान पंच वांगडी बाळा शेटकार हांची सुटका केली. तेच गाडयेंतल्यान ते परस्पर पंच वांगड्यांक तांच्या घरा पावयले. तांकां पंचायत कार्यालयांत येवपा पसून आडायले.ते खातीर दोन पंच वागडी हजर आशिल्ल्यान हो अविस्वास थाराव शेळलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
