भांगरभूंय | प्रतिनिधी
पणजी : गोंयांत चोरयो वाडतूच आसात. आयिल्ले दिसा चोरयांचीं प्रकरणां उक्तडार येतना दिसता. अशीच एक चोरी सोमारा मध्यान रातीर चांदर वाठारांत घडिल्ल्यान ह्या वाठारांत सध्या भंयाचें वातावरण पातळ्ळां. कारण हे चोरये वेळार थळाव्याचेर सुरयेन हल्लो करून एका अनवळखी चोरान लाखांनी रुपयांच्यो भांगरा वस्ती आनी पयशे चोरून व्हेल्ल्याची म्हायत मुखार आयल्या. हल्लो जाल्ल्याचें नांव निकॉल डिकोस्टा अशें आसा.
ह्या प्रकरणा विशीं चड म्हायती प्रमाण, सोमारा मध्यान रातीचेर सुमार 1. 30 ते 2 वरां मजगतीं चांदर एक चोरी जाली. डिकोस्टा हे आपल्या घराकडेन परतताले. तेन्ना पयलींच्यानूच डाव धरून राविल्ल्या चोरांनी ताचेर अचकीत हल्लो केलो. चोरांनी चार भांगराच्यो सरपळ्यो, एक भांगराचें ब्रेसलेट, मुदयो आनी पयशे ताचे कडल्यान चोरून व्हेले. ह्या हल्ल्यांत डिकोस्टा जखमी जाल्ल्यान तांकां हॉस्पिटलान दाखल केलो.
थळाव्यांनी ह्या चोरांक अटक करपाची मागणी केल्या. सध्या पुलीस चोरांचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
