भांगरभूंय | प्रतिनिधी
चंद्राच्या काळ्या वटेनच्या नमुन्याचे तपासणी मिशन सुरु
वेनचांग, खबरां संस्था ः चंद्राच्या पयसुल्ल्या (काळ्या) वटेनच्यान नमुने एकठांय करून वैज्ञानिक अभ्यासा खातीर धर्तरेचेर परत हाडपी चीनाचें 53 दिसांचें चंद्र संशोधन मिशन ‘चांग-ई-6’ शुक्रारा सुरू जालें. चीनाच्या दक्षीण हैनान दर्यादेगेवयल्या ‘वेनचांग’ अंतरिक्ष प्रक्षेपण केंद्रांतल्यान ‘लाँग मार्च-5 वाय रॉकेट’ वरवीं हें मिशन येसस्वीपणान प्रक्षेपण केल्ल्याची घोशणा अधिकाऱ्यांनी केली.
मनशाच्या चंद्र संशोधन मिशनाचो हो पयलोच यत्न अशें चीनाच्या राश्ट्रीय अंतरिक्ष प्रशासनान (सीएनएसए) सांगलां. ‘चांग-ई-6’ मिशनांत ऑर्बिटर, लँडर, एसेंडर आनी रि-एंट्री मॉड्यूल अश्या चार घटकांचो आस्पाव आसा. चंद्राची धुल्ल आनी खडपां एकठांय केल्या उपरांत एसेंडर नमुने चंद्राचे कक्षेंत धाडून रि-एंट्री मॉड्यूलांत हस्तांतरीत करपाक धाडटले, जे तांका धर्तरेचेर परत व्हरतले.
चांग-ई-6 च्या लँडरांत इटली, फ्रांस आनी स्वीडनांतलीं शास्त्रीय उपकरणां आसतली, विशेश म्हळ्यार ऑर्बिटरांत पाकिस्तानी ‘पेलोड’चो आस्पाव आसा. शांघाय विद्यापिठाच्या एसजेटीयू आनी पाकिस्तान अंतरिक्ष एजन्सी ‘सुपार्को’ हांच्या सहकार्यान ‘आयक्यूब-क्यू’ हो कृत्रीम उपग्रह तयार केला.
मोहिमेक पौराणिक नांव
चीनांतल्या पौराणीक चंद्रदेवी वयल्यान ‘चांग’ हें नांव दवरला. ‘चांग-ई-5’न चंद्राचे वटेनचे नमुने एकठांय केल्यात. ताचें विश्लेशण केल्या उपरांत चंद्राचेर उदक मेळ्ळें. फुडाराक चंद्राचेर केंद्र उबारपाची येवजण चीनान आंखल्या. चीनान हाचे पयलीं लँडींग रोव्हरा सयत चंद्राचेर मनीसबळ नाशिल्लें मिशन येसस्वीपणान केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
