भांगरभूंय | प्रतिनिधी
चवथ ही परब गोंयांत तशीच महाराष्ट्रांत व्हडा उमेदीन मनयतात. ही परब खूब जाणांच्या आवडीची. चवथीच्या निमतान विंगड विंगड वाठारांत तशेंच विदेशांत रावपी लोक आपल्या मूळ गांवांत येतात आनी एकठांय जावन मायेमोगान हो सण मनयतात. भुरग्यां पासून जाण्ट्यां मेरेन दर एकलो दोळ्यांत तेल घालून ह्या सणाची वाट पळयता. चवथ मंगळारच्यान सुरू जाल्या. फुडले 11 दीस तरी ती नेटान चलतली. कांय कडेन 21 दीस पसून चवथ मनयतात.
चवथीचो सण देड दिसा पासून 21 दिसां मेरेन मनयतात. ह्या सणाची तयारी श्रावण म्हयन्याच्यान सुरू जाता. बायलां नेवऱ्यो करपाक आनी घर निवळ करपाक मग्न आसतात. तशेंच दादले, भुरगे मखरां करपाक आनी घर रंगोवपाच्या कामाक लागता. आदले दिसा माटोळी बांदतात. चवथी दिसा सकाळीं गणपती घरांत हाडटात आनी भटजीक आपोवन गणपती पुजेक लायतात. गणपती घरांत आयलो काय बरें भक्तीमय वातावरण जाता. सगळीं घरांतली मेळून आरती, भजना आनी फुगड्यो घालतात. त्या टाळांच्या आवाजान तर मन सामकें तृप्त जाता. फुगड्यांचो सूर कानांत गुणगुणतात. आमची लोककला सांबाळून दवरपी हो उत्सव. फुगडी, घुमट आरती तिगून उरल्या, तातूंत चवथीचें बरेंच व्हडलें योगदान
आसा.
ह्या सणाच्या निमतान दुसरे कडेन रावपी कुटुंबांतले मनीस गांवघरा येतात. सगळीं बरीं मेळून मिसळून वावुरतात. कसलीय वायटपणा आसली जाल्यार तें कांयच मनान दवरीनासतना सगळीं एकठांय येवन ही परब मनयतात आनी गणपतीची सेवा करतात. गणपती विर्सजनाक वतना तर प्रत्येक मनशाच्या, खास करून भुरग्यांच्या दोळ्यांतल्यान दुकां येतात. घर रितें रितें
दिसता.
चवथीची परब व्हडा उमेदीन मनयतनाच आमच्या कडल्यान पर्यावरणाचें प्रदुशण जावचें ना हाची जतनाय घेवप तितलेंच म्हत्वाचें. कारण हाचो फायदो वा लुकसाण आमकांच जावपाचें आसा. थोड्या कडेन लोक मिरवणूक काडटना खूब फोग
लायतात.
म्हज्या भावा- भयणांक म्हजें एकच मागणें, फोगाचो वापर जाता तितलो कमी करचो आनी पर्यावरण राखचें. फोगाक लागून आवाज, हवेचें प्रदुशण जाता आनी हाचो त्रास सामान्य मनशाक, मोनजातीक आनी झाडांपेडांक लेगीत जाता. तें पळोवन मनाक खूब वायट दिसता. गणपती ही पवित्र देवता. तिच्या विसर्जन मिरवणुकूय पवित्रतायेन जातली, हें प्रत्येकान पळोवपाक
जाय.
आमी आमचें पर्यावरण इबाडलें जाल्यार ताचो फुडले पिळगेक खूब त्रास जावपाक शकता. न्हय जातलोच. देखून हे पिळगेचो फुडार आमच्याच हातान आसा. जशें आमच्या जाणट्यांनी हें सोबीत पर्यावरण आमचे कडेन पावयला तशेंच आमी तें फुडले पिळगे मेरेन पावोवपाक जाय. इतलेंच न्हय, तर सध्या आसा ताचे परस बरें पर्यावरण आमी तांकां दिवपाक जाय. चवथीची परब मोठ्या
उमेदीन मनयतनाच आमचें पर्यावरण राखपाचो आमी हावेस बाळगुया आनी ते प्रमाण कृती करून आमचो सगल्यांचो फुडार पर्जळीत करूया.
रुपाली मांजरेंकार
वास्को
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
