भांगरभूंय | प्रतिनिधी
खबरां संस्था
फ्लोरिडाः पांच मॅचींचे टी-20 माळेंतले चवथे मॅचींत भारतान वेस्ट इंडिजाक 59 धांवड्यांनी हारयले. फ्लोरिडांतल्या सेंट्रल ब्रॉवर्ड रिजनल पार्क स्टेडियमाचेर ही मॅच जाली. भारतान माळेंतली पयली आनी तिसरी मॅच जिखिल्ली. ताका लागून भारता कडेन आतां 3-1 अशी जैताची आघाडी आसा.
भारतान वेस्ट इंडिजाक जैता खातीर 193 धांवड्यांचे लक्ष्य दिल्लें. मात भारताच्या बॉलिंगे सामकार वेस्ट इंडिजाचो पंगड 19.1 ओव्हरींत 132 धांवड्यो करपाक शकलो. 82 धांवड्यांत तांचो अर्दो पंगड बाद जालो. कॅप्टन निकोलस पूरन आनी रोव्हमन पॉवेल हांणी सगल्यांत चड 24-24 धांवड्यो केल्यो. भारताच्या अर्शदीप सिंगान तीन विकेटी घेतल्यो. आवेश खान, अक्षर पटेल आनी रवी बिश्नोय हांणी देरीकी दोन विकेटी घेतल्यो.
निकोलस पुरनाना टॉस जिखून भारताक पयलीं बॅटिंग दिल्ली. भारतान आपल्या डावांत 5 बाद 191 धांवड्यो केल्यो. ऋषभ पंतान 31 बॉलांत सगल्यांत चड 44 धांवड्यो केल्यो. कॅप्टन रोहीत शर्मान 33, संजू सॅमसन नाबाद 30, सूर्यकुमार यादव 24 आनी दीपक हुडान 21 धांवड्यांचें योगदान दिलें. अक्षर पटले 20 धांवड्याचेर नाबार रावलो. वेस्ट इंडिजाच्या अल्झारी जोसेफान चार ओव्हरींत 29 धांवड्यो दिवंन दोन विकेटी घेतल्यो. ओबेड मॅकॉयान दोन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
