चवथे खेपे भारत वस्ताद

भांगरभूंय | प्रतिनिधी

येजमान भारताच्या हॉकी पंगडान आशियायी चॅम्पियन्स ट्रॉफी जिखली. ताणें फायनल मॅचींत मलेशिया पंगडाचें कठीण आव्हान 4-3 अशें मोडून काडलें. भारतान चवथे खेपे वस्तादपण जोडलें. ह्या जैता सयत ही सर्त चड खेपे जिखपी पंगड थारलो.

हांगाच्या मेयर राधाकृष्णन स्टेडियमाचेर आपली पांचवी फायनल खेळपी भारत मध्यांतरा मेरेन 1-3 अशा फरकान फाटीं आशिल्लो. तिसऱ्या क्वॉर्टराच्या अखेरच्या मिनटांनी दोन गोल करून बरोबरी सादली. ते उपरांत चवथ्या क्वॉर्टराच्या अखेरच्या मिनटांनी आकाशदीप सिंगान गोल करून भारताक 4-3 अशें जैत मेळोवन दिलें.

भारता वतीन जुगराज सिंगान 9व्या मिनटाक, मुखेली हरमनप्रीत सिंगान 45व्या मिनटाक, गुरजंत सिंगान 45व्या मिनटाक आनी आकाशदीप सिंगान 56व्या मिनटाक गोल केलो.

मलेशिया वतीन अजराई अबू कमाल हाणें 14व्या मिनटाक, रहीम राझेन 18व्या मिनटाक आनी मुहम्मद अमीनुदीन हाणें 28व्या मिनटाक गोल केलो.

पयल्या क्वॉर्टरांत दोनूय पंगडांनी जबरदस्त खेळ केलो. सर्तींत आक्रमक पद्दतीन खेळ करपी भारताक मॅचीच्या आठव्या मिनटाक पॅनल्टी कॉर्नर मेळ्ळो. हो पॅनल्ट कॉर्नर जुगराज सिंगान गोलान रुपांतरीत केलो. पूण, क्वॉर्टर सोंपपाक कांय खीण बाकी आसतना मलेशियाच्या अझराई अबू कमालान बरोबरीचो गोल केलो.

भारताक परतून आघाडी घेवपाची संद 15व्या मिनटाक मेळिल्ली. भारताक पॅनल्टी कॉर्नर मेळिल्लो. पूण, भारताक गोल करपाक जमलो ना. ताका लागून पयल्या क्वॉर्टरांत स्कोर 1-1 असो बरोबरींत उरलो.

दुसऱ्या क्वॉर्टरांत मलेशियान भारताक खर धपके दिले. पुराय सर्तींत भारताचे बचाव फळयेन प्रतिस्पर्धी पंगडांक गोल करपाची चड संद दिवंक नाशिल्ली. पूण, मलेशियान फायनलीच्या दुसऱ्या क्वॉर्टरांत भारताची बचाव फळी भेदली.

मलेशियाक 18व्या मिनटाक पॅनल्टी कॉर्नर मेळ्ळो. पयलो यत्न फसल्या उपरांत दुसऱ्या यत्नांत रहीम राझेन दुसरो गोल करून स्कोर 2-1 असो केलो. ते उपरांत 24व्या मिनटाक आनीक एक पॅनल्टी कॉर्नर मेळ्ळो. पूण, गोल करपाक मलेशियाक अपेस आयलें.

27व्या मिनटाक परतून एकदा मलेशियाक पॅनल्टी कॉर्नराचेर गोल करपाची संद मेळ्ळी. मोहम्मद अमिनुद्दीन हे संदीचो फायदो घेतलो. ताणें 28व्या मिनटाक गोल करून मलेशियाक 3-1 अशी म्हत्वाची आघाडी मेळोवन दिली.

तिसऱ्या क्वॉर्टरांत मलेशियान घेतिल्ली 3-1 आघाडी कमी करपा खातीर भारतान नेटाचो यत्न केलो. भारतान हे खातीर दोन पॅनल्टी कॉर्नर लेगीत मेळयले. 32व्या आनी 36व्या मिनटाक भारताक पॅनल्टी कॉर्नर मेळ्ळे. पूण, ताका गोल करपाक अपेस आयलें.

43व्या मिनटाक मलेशियाक लेगीत एक पॅनल्टी कॉर्नर मेळिल्लो. पूण, ताका लेगीत गोल करपाक जमलो ना. तिसऱ्या क्वॉर्टराच्या अखेरच्या मिनटाक भारतान परतून पॅनल्टी कॉर्नर मेळयलो. हरमनप्रीत सिंगान संदीचो फायदो करून घेतलो. ताणें भारता वतीन दुसरो गोल करून मलेशियाची आघाडी 2-3 अशी उणी केली. ते उपरांत गुरजंत सिंगान 45व्या मिनटाक मैदानी गोल करून 3-3 अशी बरोबरी सादली.

चवथ्या क्वॉर्टराच्या पयल्या धा मिनटांच्या खेळांत दोनूय पंगडांक गोल करपाक अपेस आयलें. मलेशियाक 50व्या मिनटाक आनी भारताक 54व्या मिनटाक आनी 55व्या मिनटाक पॅनल्टी कॉर्नर मेळिल्लो. पूण, दोनूय पंगडांक गोल करपाक अपेस आयलें.

56व्या मिनटाक आकाशदीप सिंगान मैदानी गोल करून भारताक म्हत्वाच्या खिणाक आघाडी मेळोवन दिली आनी होच गोल भारताक वस्तादपण मेळोवन दिवपाक म्हत्वाचो थारलो.