भांगरभूंय | प्रतिनिधी
म्हापशें: नगराध्यक्ष शुभांगी वायंगणकार आनी उपनगराध्यक्ष चंद्रशेखर बेनकार ह्या दोगांक भाजपा पक्ष श्रेश्ठींनी आपलीं पदां सोडपाचो आदेश दिला. हे विशींची निश्चीत तारीख दिल्ली ना. पूण चवथी उपरांत वयल्या दोनूय पदांचेर नव्यांची नेमणूक जावपाची शक्यताय आसा.
नगराध्यक्ष आनी उपनगराध्यक्ष हांचो एक वर्साचो कार्यकाळ सोंपला. पक्ष फुडारी आनी कांय नगरसेवक वायंगणकार आनी बेनकार हांचे कार्यपद्दतीचेर खोशी नात. ह्या दोगांय विशीं खूबश्यो कागाळी नगरसेवक आनी पालिका कर्मचाऱ्यांनी भाजपा पक्ष श्रेश्ठीं कडेन केल्ल्यो. ते प्रमाणूच कदेल सोडपाचे निर्देश पक्ष फुडाऱ्यांनी वयल्या दोगांकूय दिल्यात.
पक्ष श्रेश्ठींनी नगराध्यक्ष आनी उपनगराध्यक्ष हांकां ताकतिकेन राजिनामे दिवपाची सुचोवणी केल्या. पूण चवथ लागीं पाविल्ल्यान आनी अशा वेळार पालिका मंडळांत राजकी बदल केल्यार म्हापशें बाजरांतले चवथीचें नियोजन आनी हेर गजालींचेर परिणाम जावंक शकता. ताका लागून हे वेवस्थीची जापसालदारकी सद्याचे नगराध्यक्ष आनी उपनगराध्यक्ष हांचेर दिवप. उपरांत मात दोगूय स्वता जावन राजिनामे दितले अशी म्हायती खाशेल्या गोपां कडल्यान मेळ्ळ्या.
मजगतीं, चार दिसां पयलींच नगरसेविका डॉ. नूतन बिचोलकार हांणी भाजपांत प्रवेश केला. तेन्ना सावन नगराध्यक्षपदाच्या फेरबदलाचे वारें पालिका मंडळांत व्हांवूंक लागलां. डॉ. बिचोलकार हांच्या गळ्यांत नगराध्यक्षपदाची जाल्यार नगरसेवक विराज फडके हांच्या गळ्यांत उपनगराध्यक्षपदाची माळ पडपाची आसून तशें नियोजन लेगीत भाजपा फुडाऱ्यां कडल्यान केलां.
मजगतीं, विरोधी गटांतल्यो दोनूय बयल नगरसेविका लेगीत येता त्या कांय दिसां भितर भाजपांत प्रवेश करपाच्यो आसात. ह्या दोगांनीय सकारात्मक तयारी दाखयल्या. तांणी आपापल्या कार्यकर्त्यांक आनी बरें मागप्यांकूय हाची कल्पना दिल्या. हाका लागून सत्ताधारी पालिका मंडळाचें संख्याबळ अजून घटमूट जातलें अशी म्हायती लेगीत गोपांनी दिली.
पालिका मुख्याधिकारी सीताराम सावळ हांची लेगीत म्हापशें सावन हेर कडेन बदली जातली. तशें संकेत हालींच आमदार ज्योशुआ डिसोझा हांणी दिल्ले. पालिका मंडळ आनी कर्मचारी वर्गा कडल्यान गरजेचें सहकार्य मेळनाशिल्ल्यान मुख्याधिकारी सावळ हांणी उक्तेपणान निरशेवणी उक्तायिल्ली. आपली हेर कडेन बदली करची अशी विनंतीय तांणी वरिश्ठां कडेन केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
