भांगरभूंय | प्रतिनिधी
लायट नाशिल्ल्यान साबार गांव काळखांत; दाबोस उदक प्रकल्पाची यंत्रणा पडली बंद
वाळपयः जुस्त चवथीक सत्तरी म्हालांतल्या भोवतेक सगळ्याच वाठारांत पियेवपाच्या उदकाचो खर उणाव जाला. हाका लागून भावीक बेजारल्यात. चवथीच्या दिसांनी अशें तरेन उदकाचो उणाव जावप ही खऱ्यांनी वायट गजाल, अशें तांचें म्हणणें आसा.
मेळिल्ले म्हायती प्रमाण वीज पुरवण खंडीत जाल्ल्यान ताचो उदका पुरवणेचेर परिणाम जाला. वीज पुरवण बंद जाल्ल्यान दाबोस उदका प्रकल्पाची यंत्रणा बंद पडली. जर हे सुवातेचेर जनरेटराची वेवस्था आशिल्ली जाल्यार चवथीच्या दिसांनी लोकांचेर पियेवपाच्या उदकाचें संकश्ट येवचें नाशिल्लें, अश्यो प्रतिक्रिया ह्या वाठारांतल्या लोकांनी उक्तायल्यात.
बुधवारच्यान चवथीक सुरवात जाल्या आनी जुस्त ह्याच वेळार गांवांत पियेवपाच्या उदकाची समस्या निर्माण जाल्या. मेळिल्ले म्हायती प्रमाण वीज सरयांचेर झाड पडिल्ल्यान दाबोस आनी मासोड्डें वाठारांतली वीज पुरवण खंडीत जाली. हाका लागून दाबोस उदक प्रकल्पाची यंत्रणा बंद पडली. ताचो परिणाम उदक पुरवणेचेर जालो.
बुधवारा दनपारां आनी बिरेस्तारा दीसभर सत्तरी म्हालांतल्या सगळ्याच वाठारांनी उदकाचो खर उणाव निर्माण जाल्लो. वाळपय भौशीक उदक पुरवण कार्यालया वतीन खूबशा गांवांनी टँकर धाडून उदक पुरवण करपाचो यत्न केलो. न्हंयदेर वाठारांत रावपी लोकांनी आपली गरज न्हंयेच्या उदकाचेर पुराय केली.
खंडीत वीज पुरवणे संबंदांत वाळपय वीज कार्यालयाचे सहाय्यक अभियंते दीपक गांवस हांचे कडेन प्रतिनिधीन संपर्क केलो तेन्ना तांणी सांगलें, बुधवारा सांजे वेळार खूबशा वाठारांनी वादळी वारो आयलो. तातूंत खूबशीं झाडां आनी झाडाचे खांदे पडले. तातूंत वीज खात्याच्या यंत्रणेचें व्हड प्रमाणांत लुकसाण जालां. मासोड्डें आनी दाबोस वाठारांतूय वीज सरयांचेर झाडां पडिल्ल्यान वीज पुरवण खंडीत जाली. हाका लागून दाबोस उदक प्रकल्पाक वीज पुरवण करप शक्य जावंक ना. बिरेस्तारा दनपार मेरेन वीज दुरुस्ती केल्या. ताका लागून सगळ्या वाठारांतली वीज पुरवण जाग्यार पडल्या, अशें गांवस हांणी सांगलें. मजगतीं, दाबोस उदक प्रकल्पाचेर जनरेराची वेवस्था करात, अशी मागणी थळावे लोक फाटल्या 10 वर्सां सावन करतात, पूण ही सुविधा उपलब्ध जावंक ना. ह्या प्रकल्पाचेर जनरेटर आशिल्लो जाल्यार चवथीच्या दिसांनी उदकाचो उणाव जावचो नाशिल्लो. मात सरकारी यंत्रणा हे कडेन पुराय आडनदर करता, असो आरोप थळाव्या लोकांनी केला. थळावे आमदार विश्वजीत राणे हांणी ह्या प्रकरणांत लक्ष घालचें, अशी थळाव्या लोकांनी नव्यान मागणी केल्या.
बिरेस्तारा उदक पुरवण जाग्यार पडटलीः गावडे
बुधवारा दनपारां 2.30 वरांच्या सुमाराक वीज पुरवण खंडीत जाल्ली, ती रातच्या 9 वरांच्या सुमाराक परतून आयली. पूण परतून ती रोखडीच खंडीत जाली. बिरेस्तारा परतून एकदां लायट गेली. ती परतून आयले उपरांत उदक प्रकल्पाची यंत्रणा सुरू केली, पूण ती सुरू केले उपरांत विवीध वाठारांतली उदका पुरवण जाग्यार पडपाक 6 वरां लागतात. ताका लागून बिरेस्तारा राती मेरेन सगळ्यांत उदक मेळपाची शक्यताय आसा, अशें वाळपय भौशीक उदक पुरवण कार्यालयाच्या दाबोस उदक प्रकल्पाचे सहाय्यक अभियंते प्रशांत गावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
