भांगरभूंय | प्रतिनिधी
चवथ येताच, सगलेच ‘बाप्पा मोरया रे’ ही तीन उतरां सहज तोंडांत गुणगुणपाक लागतात. तो भाव, ती भक्ती काळजांतल्यान ओंठार येवन तांचो स्फोट जाता. अश्याच चवथीच्या भक्तीरस वातावरणांत काणकोणचे मातयेंतले कलाकार अमोल प्रभुगांवकार हांणी ‘बाप्पा मोरया रे’ हें कोंकणी गीत 17 सप्टेंबर 2023 दिसां बि. टी. एस प्राॅडक्शन्स ह्या आपल्या युट्यूब चॅनलाचेर लोकार्पित केलें.
‘बाप्पा मोरया रे’ ह्या तीन उतरांक चाल लावन जायती मराठी गितां, आरत्यो आमकां आयकूंक मेळटात, पूण गोंयचो साज आनी साद चडोवन आयिल्लें कोंकणी गीत म्हणल्यार अमोल प्रभुगांवकारान शिव नायक हांच्या संगीताच्या आनी कृतिका राऊत हिच्या लेखणीच्या सुमेळांत गायिल्ले ‘बाप्पा मोरया रे’ आपली अशीं एक नवीन चाल आयकुपींच्या ओंठार बसोवन वता.
‘शेंदूर सोंडीर,
मोदक हातीर,
तुज्या मंगलमुर्ती…
संकट हारी तार आमकां
हे महा गणपती…’’
ह्या गितांतल्या साद्या वळींतल्यान आमकां गणपतीचे वर्णन केल्लें दिसता. वळीं जरी साद्यो आनी सोंप्यो दिसल्यो तरीय ताका लायिल्ली चाल तोखणाय करपा सारकी.
आदी गीत म्हणल्यार तांतूतले शब्द आनी संगीत हांच्या मेळगरांतल्यान फक्त श्राव्य सुख दिवपी कला आशिल्ली, पूण आतां तंत्र विकसीत जायत गेल्ल्यान गीत दृक आनी श्राव्याचो कला प्रकार जाला. हे गितांतूय आमकां नेहाल च्यारीन बऱ्यापैकी आपल्या कॅमेऱ्यांतल्यान एक काणी सांगपाचो सुंदर यत्न केला. गोंयकारांचे भुरगेपणाचें चित्र, तांची निरागस मस्ती, घट्ट आनी गोड इश्टागत तशेंच तांचें तरणाटेंपण भोव सोबितकायेन चित्रायलां. हातूंतल्यान गिताची, दिग्दर्शकाची सुक्ष्म आनी रेखीव नदर आमकां समजता. गितांत धोल-ताशे , फुगडी, फोली, रांगोळी हें सगळें चवथीचें वातावरण निर्माण करताच, पूण गितांत आयिल्लो घुमट आनी शमेळाचो गाज तेच परीन गिताच्या अखेरेक आयिल्ली,
‘लंबोदर पीतांबर
फणीवर बंधना…’
ही आरती गिताची सोबाय वाडयता आनी सहज मनांत भक्तीरसाचे उमाळें जागयता. ह्या गीताचो आस्वाद तुमी स्पॉटीफाय ॲपाचेरूय आतां घेवंक शकतात.
कोंकणी गितांच्या भक्तीरसाच्या इतिहासांत ‘बाप्पा मोरया रे’ ह्या गिताचें योगदान म्हत्वाचें थारलां.
– देविता खुळे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
