भांगरभूंय | प्रतिनिधी
चवथ जाली. देड, पांच, सात, णव आनी इकरा दिसांचे गणपती व्हड उमेदीन पावयले. देड दिसाचे गणपती पावयले आनी दुसरेच दिसा दर्यांत पावयिल्ले कांय गणपती परते देगेर पावले म्हणपाची खबर आयली. कांय समाजसेवकांनी तांचें परतें विसर्जन करतनाचे फोटूय सोशल मिडियाचेर घाले. आतां गणपतींक इतले बेगीन वच्चें नासलें म्हूण त्यो मुर्ती परत्यो तडीर आयल्यो काय कोणेतरी लागींच बुडोवन वावर काडिल्लो कळप कठीण. पूण मुर्ती परत्यो देगेर आयिल्ल्यो खऱ्यो.
कांय जाणांचें म्हणणें त्यो प्लास्टर ऑफ पेरिसाच्यो जाल्ल्यान उदकांत विरगळनासतना ल्हारां वांगडा देगेर पावल्यो. पीओपीच्यो मुर्ती वजनान हलक्यो आसतात म्हूण त्यो उफेतात. तशेंच त्यो बेगीन विरगळनात आनी ल्हारां वांगडा देगेर पावंक शकतात. पूण गोंयांत पीओपी मुर्तींचेर सरकारान बंदी घाल्या. इतलेंच न्हय तर सगल्यो मुर्ती तपासल्या म्हणपाचें कांय दीस आदीं जाहीर जालां. जंय पीओपी मुर्ती मेळ्ळ्यात तीं दुकानां बंद केल्यांत म्हणपाच्यो खबरो कांय दीस आदीं वाचूंक मेळ्ळ्यात. तरी आसतना पीओपी मुर्ती लोकांगेर पावल्योच कश्यो? ज्या लोकांनी शाडू मातयेचे दुडू दिवन ह्यो मुर्ती घेतल्यो तांचे कडेन फटिंगपणां जालीं अशें जालें ना? लोक काय जाणुनबुजून असल्यो मुर्ती घेवचे नात. म्हणटकूच जांणी ह्यो मुर्ती मातयेच्यो म्हूण सांगून विकल्यो ते लोकांच्या भावनां कडेन खेळ्ळे म्हणचें पडटलें.
जांणी कोणे ह्यो देगेर आयिल्ल्यो मुर्ती परत्यो दर्यांत पावयल्यो तांणी ह्या मुर्तींचे सारके बरे फोटू सगल्याक प्रसिद्ध करूंक जाय आशिल्ले. जांणी कोणे ह्यो मुर्ती विसर्जीत केल्यात ते आपणे पुजेक लायिल्ले मुर्तीक खात्रीन वळखुपाचे. आनी एकदां वळख मेळ्ळी म्हणजे आपले भावने कडेन मुर्तीकार खेळ्ळा म्हणपाचें तांकां कळपाचें. आपणे कोणा कडल्यान मुर्ती हाडल्या हें तांकां खबर आसतलेंच म्हणटकूच ताका जाप विचारप आनी ताचेर कागाळ करप सोंपें आसलें.
हय, मुर्तीकाराचेर कागाळ करुंकूच जाय. एक तर ताणें फटिंगपणां केल्यांत. शाडू मातयेची म्हूण सांगून पीओपी मुर्ती लोकांक विकल्या. पयशे घेतना मातये मुर्तीचे घेतल्यात आनी सरकारान बंदी घाल्ल्यो प्रदुशण करपी मुर्ती लोकांच्या गळ्यांत घाल्यात. इतल्यान सोंपूंक ना, आतां तो मुर्तीकार आपणें शाडू मातयेच्यो मुर्ती करून विकल्यात म्हूण सांगून सरकारा कडल्यान अनुदान घेतलो. म्हणजेच ही डबल लूट. सरकार हांकां अनुदानाच्या रुपांत वांट्टा ते लोकांचेच दुडू. मुर्तीकार लोकां कडल्यान शाडू माती म्हूण सांगून चड पयशे घेता आनी सरकारा कडल्यान अनुदान घेता. दोगांयकूय कशे लुट्टा पळेयात. वेल्यान प्रदुशण निवळ करूंक सरकाराक आनीक खर्च. हें चलूंक दिवंक जायना. असल्या मुर्तीकारांक अनुदान न्हय तर तांचेर बंदीच हाडूंक जाय. मुखार तांकां हो धंदो करूंक दिवंक जायना. सरकारान हें पावल उखलचेंच नासल्यार असले प्रकार थांबचे नात.
चवथ म्हणटात ती सैम पुजा. सैमान आमकां भरभरून दिलां म्हणून सैमाचे उपकार मानपाक आमी चवथ मनयतात. पूण सद्याक जें चल्लां तें पळयल्यार आमी सैमाचे उपकार मानतात काय सैमाची वाट लायतात तेंच कळना. सद्याक जे तरेन लोक चवथ मनयतात तें पळेल्यार आमी प्रदुशणांत भर घालून सैमाची वाट लायतात म्हणपाचें नदरेक येतलें. पीओपी मुर्ती वांगडा निर्माल्य हें सगलें उदकांत उडयतकूच उदक प्रदुशीत जातलेंच. गणपती पुजेक लायतना आनी पावयतना आवाजाचें प्रदुशण. एक गजाल कळना, जेन्ना कसलीय पुजा वा देवाचें कितेंय करतात तेन्ना कान फुटपा सारको आवाज करुंकूच जाय? आपल्या शेजाऱ्याक त्रास जावं येता असलें कांय करचें न्हय म्हणपाचें आमकां कळूंक जाय न्हय!
पूण आमी कितें करतात तर लावडस्पिकर, डिजे लावन सगलो वाठार हालोवन सोडटात. एकलो करता म्हूण दुसरो करता. आनी कोणाकूय सांगूक गेल्यार…. सांगपाची सोय आसा? हळशिकेंत फातोर मारिल्ले वरी आंगार उसळावन घेवपाचें. आरे बाबा, कोणतरी जाण्टो आसा, ल्हान भुरगीं आसात, तांचो एक न्हिदपाचो वेळ बी आसता. तांकां त्रास जायत अशें कितेंय करचें न्हय म्हणपाचें कशें कळना काय ह्या सुशिक्षीत लोकांक? आनी गणपती विसर्जना वेळार कितें पळोवपाचें? भर रस्त्यार फोग मारप, रस्त्या वेल्यान वचपी सगली येरादारी बंद उडोवप, लोकांच्या गाडयां पोंदा फुगेट्यो, बॉम्ब लावप. बाबा कसलीय दुर्घटणा घडूं येता हाचो विचारूच ना. ते बॉम्ब तर लोकांच्या कानांचे पड्डे फोडून उडयतात. रस्त्यान वचपी लोकांचेच न्हय जाल्यार घरांत दारां-जनेलां बंद करून न्हिदिल्ल्यांचेय. ल्हान भुरगीं बाबडीं न्हिदेंत आंग काडून जागीं जातात तें पळेल्यार आंगार कांटो येता. फुडले कितले तरी दीस तीं न्हिदचीच नात म्हणल्यार जाता. जनावरांचे हाल तर सांगुकूच नाका. असल्यांनी देव आमकां पावतलो अशें दिसता तुमकां?
आनी विसर्जना वेळार जो कितें नाच चलता तो पळोवन गणपती कंटाळटलो काय दिसता. हे चवथ मनयतात काय शिगमो खेळटात तेंच कळप कठीण. हीच काय ती आमगेली संस्कृती? संस्कृतीचे गोडवे गायतल्यांनी हाचेर विचार केल्यार बरो. ‘पुढच्या वर्षीं लवकर’ अशें आमी कितलेंय म्हणलें तरी ताका येवपूच नाका दिसतलें. आमी चवथीच्या नांवान जो विध्वंस करतात, दुडवांची नासाडी करतात, प्रदुशण करून सैमाची वाट लायतात ती पळेल्यार सैम आमचेर रागार जाले बगर रावचो ना. आनी ‘सगल्यांचें कल्याण कर आनी बरें कर’ म्हूण मागलें तरी देवाचें रागणें पडले बगर रावचें ना हाची जण एकल्यान जाण दवरप गरजेचें. चवथ आसूं वा हेर खंयचोय सण, तो मंगलमय जावचो, कसल्याच प्रदुशणा बगर साजरो जावचो इतलेंच मागणें.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
