भांगरभूंय | प्रतिनिधी
गोमंतक मंदिर महासंघाची सरकारा कडेन मागणी
पणजीः अंदूं 27 ऑगस्टाक चवथ मनयतले, हे फाटभुंयेर गोमतंक मंदिर महासंघान संस्कृतीमोगी लोकांचो अभिमान वाडोवपा खातीर आनी थळावी कला तिगोवन दवरपा खातीर सरकारान चवथीक ‘राज्य महोत्सव’ म्हूण मान्यताय दिवची अशी मागणी केल्या. हें संबंदी तांणी मुख्यमंत्री डॉ. प्रमोद सावंत हांकां निवेदन सादर केलें.
ह्या वेळार गोमंतक मंदिर महासंघाच्या शिश्टमंडळांत म्हापशेंची गणेशपुरी ट्रस्ट बोर्डाची अध्यक्ष सर्वश्री दीपक गोवेकार, सुजन नायक आनी दिनीन पेडणेकार तशेंच गोंय हिंदू युवा शक्तीचे सत्यवान म्हामल आनी हिंदू जनजागृती समिती हांचो आसपाव आशिल्लो. हाचे आदीं विधानसभेच्या चालू अधिवेशनांत चवथीक ‘राज्य महोत्सव’ म्हूण मान्यताय दिवपाची मागणी करपी निवेदन आमदार दाजी साळकार हांकां सादर केलें. हें निवेदन मंत्री सुभाष फळदेसाय हांकांय दिला.
महाराष्ट्र सरकारान जशें चवथीक ‘राज्य महोत्सव’ जाहीर केला, तसो निर्णय गोंयांतूय घेवचो आनी चवथीक ‘राज्य महोत्सव’ म्हूण मान्यताय दिवची अशी मागणी निवेदनांत केल्या. गोंयांत जायत्या पिळग्यां सावन घरगुती आनी भौशीक पांवड्यार चवथ मनयतात. चवथी वरवीं भजन, फुगडी, दशावतार, पारंपारीक आरास, घुमट आरती, कलाकार आदी सांस्कृतीक दायज सांबाळून उरता. चवथीक लागून शिल्पकार, आरा, संगीत कलाकार आदी खातीर एक माची उपलब्ध जाता देखून चवथीक ‘राज्य महोत्सव’ म्हूण मान्यताय दिवची अशेंय निवेदनांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
