चवथीक भाविकांची जतनाय घेयात

भांगरभूंय | प्रतिनिधी

मडगांव पुलिशेची भौशीक गणेशोत्सव मंडळांक सुचोवणी

भांगरभूंय । प्रतिनिधी

मडगांवः मडगांव वाठारांतल्या भौशीक गणेशोत्सव मंडळांच्या प्रतिनिधीं वांगडा जाल्ले बहसके वेळार मडगांव पुलिसांनी चवथीच्या काळांत भाविकांचे भलायकेची, सुरक्षे विशीं उपाय येवजण करची. लोकांक त्रास जातलो तशेंच कायदो आनी सुवेवस्तेचो प्रस्न निर्माण जावचो ना, हाची जतनाय घेवची, अश्यो सुचोवण्यो केल्यात.

मडगांव पुलीस मुख्यालयांतल्या सभाघरांत जाल्ले बसकेक मडगांव वाठारांतले सुमार 12 भौशीक गणेश उत्सव मंडळांचें प्रतिनिधी हाजीर आशिल्ले. तांकां मडगांव पुलीस उपअधिक्षक संतोष देसाय हांचे सयत मडगांव पुलीस निरिक्षक तुळशीदास नायक, मायना कुडटरी पुलीस निरिक्षक अरूण गामवस देसाय, कुंकळ्ळी पुलीस निरिक्षक डायगो ग्राशियस, कोलवा पुलीस निरिक्षक तारी हांणी मार्गदर्शन केलें.

चवथीच्या काळांत मंडळांच्या प्रतिनिधींक सरकारा वतीन जारी केल्ले नेम पाळचे, रस्त्या कुशीक माटव घातिल्ल्या मंडळांनी चडांत चड स्वयंसेवकांची नेमणूक करची आनी येरादारीक त्रास जावचो ना, हाची जतनाय घेवची, दर्शन घेवपा खातीर येवपी भाविकांचे सुरक्षे खातीर सीसीटीव्ही कॅमेरे लावचे, गरजेची सुरक्षे खातीर उपाय येवजण क रची, भलायकी सुविधा उपलब्ध दवरची, तशेंच वीज खात्या कडल्यान आनी उजो पालोवपी दळा कडल्यान नाहरकत दाखलो घेवचो, अशें मडगांव पुलिसांनी सांगलें. येरादारीक आडखळ जावची ना, येरादारीचे नेम पाळटले, माटवा कडेन लायतात त्या स्पिकरांचो आवाज सरकाराच्या नेमा प्रमाण आसतलो, हाची जतनाय घेवची. तशेंच खंयच्याच विशया वयल्यान धर्मीक नसाय निर्माण जावची ना हाचीय जतनाय घेवची. चवथीच्या काळांत कसलीय वायट घडणूक घडली जाल्यार ताका मंडळ जापसालदार आसतलें. ते खातीर गरजेच्यो उपाय येवजण्यो करपाचेर भर दिवचो, अशें पुलिसांनी सांगलें. तेचवरी राती वेळार पुलीस गस्त दवरतले, अशेंय सांगलें.

लोकांकूय जतनाय घेवपाचो उलो

चवथीचे फाटभुंयेर मडगांव आनी भोंवतणच्या लोकांनी आपल्या मूळ घरा वतता ज ल्यार घरांतल्यो मोलादीक वस्तू आपल्या वांगडा घेवन वच्च्यो. पुलीस गस्त वाडयतले, तरी लेगीत चोरांनी चोरी केली जाल्यार व्हड लुकसाण जावचें ना, हाची जतनाय घेवप गरजेचें आसा. दुसऱ्या गांवांत वतात जाल्यार ताची कल्पना लागींच्या पुलीस स्टेशनाक लेगीत दिवची, अशें मडगांव पुलिसांनी कळयलां.