भांगरभूंय | प्रतिनिधी
सरपंच रोशन रेडकार, प्रदीप घाडी आमोणकार, सुनील दिवकाराची चवकशी
पणजी : बर्च बाय रोमिओ लेन दुर्घटना प्रकरणांत अधिकारी तशेंच हेर संबंधीतांची चवकशी सुरू आशिल्ल्यान चवकशी अहवाल सादर जावपाक कळाव जातलो. घडणुकेची चवकशी करपा खातीर दंडाधिकार्यांचे समितीक सरकारान एका सप्तकाचो वेळ दिल्लो. इतले मजगतीं दंडाधिकार्यांचे समितीन हडफडेंचे सरपंच रोशन रेडकार तशेंच जमनीचे मूळ धनी प्रदीप घाडी आमोणकार तशेंच सुनील दिवकार हांची चवकशी केल्या.
कागदपत्रां तशेंच परवान्यांची पडताळणी आनी संबंधीतांची चवकशी सुरू आसा. संबंधीतांच्या चवकशेक लागून अहवालाक मात्सो कळाव जातलो, अशी म्हायती दंडाधिकारी अंकीत यादव हांणी दिली. निलंबित जाल्ल्यो प्रदुशण नियंत्रण मंडळाच्यो तेन्नाच्यो वांगडी सचीव शमिला मोंतेरो हांची लेगीत चवकशी जाल्या.
परवाने दिवपी अधिकार्यांचें म्हणणें आयकून घेवपा सयत तांचे कडल्यान हेर म्हायती घेवप सुरू आसा. ही प्रक्रीया पुराय जाले उपरांत अहवाल सादर करप शक्य जातलें, अशें दंडाधिकारी अंकीत यादव हांणी सांगलें.
हडफडेंच्या बर्च बाय रोमिओ लेनीक फाटल्या शेनवारा रातीं उजो लागून २५ जाणांक मरण आयिल्ले. हे घडणुकेक ८ दीस पुराय जाल्यात. घडणुकेच्या दुसर्याच दिसा मुख्यमंत्री डॉ. प्रमोद सावंत हांणी दंडाधिकार्या वरवीं चवकशेचे आदेश दिल्ले. तशेंच तेन्नाची पंचायत संचालक सिद्धी हळर्णकार, प्रदूशण नियंत्रण मंडळाची आदली वांगडी सचीव शमिलो मोंतेरो आनी पंचायतीचे आदले सचीव तुळशीदास बागकार हांकां निलंबीत करपाची कारवाय केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
