भांगरभूंय | प्रतिनिधी
सांखळी आनी फोंडें नगरपालिका वेंचणुकांचे निकाल भाजपाचे वटेन लागल्यात. सांखळी मतदारसंघांत फाटलीं 12 वर्सां मुख्यमंत्री डाॅ. प्रमोद सावंत वेंचून येतात. सांखळेकारांनी भाजपाक 12 मदले 11 जागे दिवन मुख्यमंत्री सावंत हांचेर, तांणी थंय केल्ल्या उदरगतीच्या कामांचेर विस्वास दाखयला. फोंड्यां 15 तले 10 जागे भाजपा समर्थक गटाक मेळ्ळ्यात. शेतकी मंत्री रवी नायक हांणी फोंडेचे पालिकेचेर आपलो शेक आशिल्ल्याचें सिद्ध केलां. अर्थांत आमच्या देशांत पालिकांचेर चडशे निकाल राज्यांत सत्ता आसा त्याच पक्षान तेंको दिल्ल्या गटा वटेन लागतात. तशे आडवाद आसात. दोनूय शारांनी बरेच नवोदित उमेदवार नगरसेवक म्हूण वेंचून आयल्यात. विरोधी गटा वटेन सांखळे एकलोच आसा. फोंड्यां पांचांतले कांय जाण सत्ता पक्षाक तेंको दिवपाक शकतात. सगल्या जैतिवंत उमेदवारांक परबीं. हारल्यांत तांणी फुडले खेप वेंचून येतलोच, हे खातीर यत्न करचे.
प्रचारा वेळा वयली कोडसाण विसरून आतां सगल्यांनी सांखळी, फोंडें शाराचे सर्वांगी उदरगती खातीर वावुरचें. सांखळे नगराध्यक्षपद बायलां खातीर राखीव आसा. ही माळ कोणाच्या गळ्यांत पडटा तें पळोवपाचें. कोणूय नगराध्यक्ष जावं तिणें चेपणा खाला येनासतना स्वतंत्र विचारांनी काम करपाची गरज आसा. तिका शार आनी सरभोंवतणच्या वाठारांची उदरगत करपाची चड संद आसा. कारण खुद्द मुख्यमंत्री सावंत त्या मतदारसंघाचे आमदार. म्हणटकच विकासकामांची सांखळूच सांखळी गांवांत उबी रावतली, अशी आस्त बाळगुपाक हरकत ना. फोंडे पालिकेक कृशीमंत्री रवी नायक हांचो तेंको आसतलो. तांचे पूतय वेंचून आयल्यात. सत्ताधारी भाजपाक दोनूय पालिकांनी विक्रमी म्हणटात, तशें जागे मेळ्ळ्यात. म्हणटकच सरकार दोनूय पालिकां वटेन उबे रावतलें, हातूंत दुबाव ना.
हेर राज्यां कडेन तुळा केल्यार गोंय तशें सुदारलां, पण हांगा समस्याच नात, अशें म्हणपाक मेळचें ना. आमचीं शारां सुदारल्यांत, मात नव्यो समस्या निर्माण जाल्ल्यान त्यो पयस करपाचो, निदान तांचेर नियंत्रण दवरपाचो यत्न करपाक जाय. वीजपुरवण, उदका पुरवण, येरादारी, भलायकी सेवा, शिक्षण अशे राज्य सरकारांनी हाताळपाचे प्रस्न देशांतल्यो काय म्हापालिका हाताळटात. आमच्यो गोंयांत पालिकांक असलीं कामां नात. पूण शारांत कसलीय समस्या आयल्यार संबंदीत खातें आनी लोक हांचे मदलो दुवो म्हूण तांणी काम करपाक जाय. नगरसेवकाच्यो खूब जापसालदारक्यो आसतात, तातूंतलें हें एक काम. लोकांचे दूत कशे तांणी सरकार दरबारांत वावरुंक जाय. संबंदीत आमदार, मंत्र्यां मुखार कामां घेवन वचप, ‘हय सायबा’ म्हणप आनी ते सांगतात तितलेंच करप… हेंच आपलें काम असो भोवतेक लोकप्रतिनिधींचो समज जाल्लो आसा. शेजारी राज्यांनी नगरसेवक हो मंत्र्या इतलोच पेजाद आसता, ताका तितलोच मान- सन्मान मेळटा, हें कोणे विसरूंक फावना.
गोंयांत कोयर, रस्ताद गोरवां, सुणीं, गटारांची नितळसाण अशीं साबार कामां पालिका करतात. आनीकूय करतलो जाल्यार खूब कामां आसात. पूण, प्रचारा वेळार दिल्लीं आस्वासनां सगलेच पाळिनात. उच्च न्यायालयान कोयराचो विलो लावपाक प्रकल्प सुरू करपाचे निर्देश दिल्ले. सगल्याच पालिकांनी (पंचायतींनीय) ते पाळ्ळ्यात अशें ना. वयल्या दोनूय पालिकांनी ते आसात आनी नेमान कोयराचो विलो लागता आसतलोच! रस्त्यां कुशीक बल्लां दवरतात, तीं नेमान नितळ जावंक जाय. लोकांनीय शक्य आसा तो कोयर घरचे घरा नश्ट करचो. जांचे कडेन जमीन आसा, तांकां हें सोंपेपणी शक्य आसा. रस्ताद गोरवांचो बंदोबस्त करप, सुण्यांक धरून तांचें निर्बिजीकरण करप हीं कामां चड म्हत्वाचीं. तांचे खातीर कोंडवाडेय बांदपाक जाय. गोरवांक अनुदानीत गोशाळांच्या सुवादीन करूं येता. हीं कामां पालिकांचीं. गोरवांक लागून अपघात जातात. तशेंच तीं बाजारकारांक त्रासदिणी थारतात. सुण्यांची समस्या तांचे परस भयानक. तांचीं रातभर धुमशेणां चलिल्ल्यान लोकांक झेम मेळना, भलायकी इबाडटा. वेंचून येतकच नगरसेवक गटारां बांदतात. पूण, तीं गरज आसा थंयच बांदचीं. कारण पावसाचें उदक तातूंतल्यान व्हांवून वचना. उरफाटीं लोकांनी घाणयारें उदक तातूंत सोडलां. जळारां पैदास केंद्रां जाल्यांत हीं गटारां. प्रत्येक गटारांचेर लादी घालप कायद्यान बंधनकारक. पूण…. !……… नव्या नगरसेवकांनी जनतेचे सेवक म्हूण कामाक लागचें. बेस्ट आॅफ लक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
