भांगरभूंय | प्रतिनिधी
कर्जत, खबरां, संस्था: कर्जतच्या एका रिक्षाचालकान हालींच आत्महत्त्या केली. कांय दिसां पयलीं सुरेश (नांव बदल्लां) हाचेर ताचे चलयेन बलात्काराचो आरोप केल्लो. सुरेश हांणी धांवते रेल्वे मुखार येवन आत्महत्त्या केली.
सुरेशाक आत्महत्त्या करपाक उर्बा दिवपाच्या आरोपा खाला ताची घरकान्न मिना (नांव बदल्लां), मिनाची आवय, भाव आनी मेवणी हांचे आड गुन्यांव नोंद केला.
सुरेशान २६ ऑक्टोबराक आत्महत्या केल्ली. आत्महत्त्येच्या एका दिसा पयलीं म्हळ्यार २५ ऑक्टोबराक सुरेशा आड बलात्काराची कागाळ केल्ली. स्वताचेच चलयेचेर बलात्कार केल्ल्याचो आरोप ताचेर मिनान केल्लो.
कर्जत पुलिसांनी सुरेशाचे आत्महत्त्ये उपरांत ताका अपघातांत मरण आयिल्ल्याचो गुन्यांव नोंद केल्लो. सुरेशान आत्महत्या करचे पयलीं ताच्या भावाक एक व्हिडिओ धाडिल्लो. हातूंत तांणी म्हणलां, ताचे बायलेक घटस्फोटा खातीर न्हयकार दिल्ल्यान ताका ह्या फट गुन्यांवा खाला आडकावपाचो यत्न चालू आसा.
फाटल्या वर्सा मिना, तिचो भाव आनी भावाचे बायले सयत कामा निमतान दुबय गेल्ली. सुरेश आनी मिनाक एक व्हडली चली आनी धाकटो चलो अशीं दोगां भुरगीं आसात. बायल घरा नाशिल्ल्यान सुरेश दोगाय भुरग्यांक पळयतालो. कांय दिसां पयलीं सुरेशाची चली मिनाच्या आवय- बापाय कडेन गेली. ह्या वेळार तिणें आपल्या आजी आज्याक सुरेशान तिचेर बलात्कार केला अशें सांगलें. हें कळटांच मिना २५ ऑक्टोबराक भारतांत आयली. मिना सुरेशाक हे विशीं विचारपा खातीर घरा गेली. तेन्ना तो घरा नाशिल्लो. मिना पुलीस स्टेशनार वचून सुरेश हाचे आड कागाळ केली. ताच्या दुसर्याच दिसा सुरेश हांणी आत्महत्त्या केली.
सुरेश हांणी ताच्या भावाक धाडिल्ल्या व्हिडिओंत म्हणलां, आपले चलयेक कोणी तरी हें शिकोवन आरोप करपाक लायल्यात. हे विशीं फुडलो तपास चालू आशिल्ल्याचें पुलीस निरीक्षक संभाजी यादव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
