भांगरभूंय | प्रतिनिधी
शिमला, खबरां संस्था: कॉंग्रेस सरकार आशिल्ल्या हिमाचल प्रदेशांत चलयांची लग्नाची पिराय वाडयल्या. आतां २१ वर्सां पिराये सकयले चलये कडेन लग्न जावप गुन्यांव थारतलो. हांगच्या कॉंग्रेस सरकारान चलयांच्या लग्ना संबंदीं ‘हिमाचल प्रदेश बाल विवाह प्रतिबंध विधेयक-२०२४’ संमत केला. देखून सगळ्या धर्मांतल्या चलयांची लग्नाची कायदेशीर पिराय १८ वर्सां वयल्यान २१ वर्सां मेरेन वाडयतले. विधानसभेंतूच संमत जाल्लें विधेयक आतां राज्यपालां कडेन धाडलां. राज्यपालान मान्य केल्यार चलयां खातीर लग्नाची कायदेशीर पिराय २१ वर्सां आसतली. चलयांक लग्नाची पिराय २१ वर्सां करपी देशांतलें पयलें राज्य हिमाचल प्रदेश थारलां. हिमाचल प्रदेशांत चलो-चली हांची पिराय २१ वर्सां वा ताचे परस चड आसल्यारूच लग्न वैध मानतले.
मुख्यमंत्र्यान कितें म्हणलें?
विधेयकाची वळख करून दितना हिमाचल प्रदेशाचे भलायकी आनी बायलां सशक्तीकरण मंत्री धनीराम शांडील हांणी सांगलें, बालविवाह कायदो २००६त बालविवाहाचेर बंदी घालपाची तरतूद आसा. राज्यांत दादलो-बायल समानताय आनी उच्च शिक्षणाची संद मेळची म्हणून चलयां खातीर लग्नाची उण्यांत उणी पिराय वाडोवप गरजेचें जालां. हाका लागून सध्या राज्यांत चलयांचें लग्न जावपाची पिराय १८ वर्सां आसा. तातूंत तीन वर्सां वाडोवन ती पिराय २१ वर्सां करतले. हे संबंदी निर्णयाक सात वर्सां आदीं मंत्रीमंडळान मान्यताय दिल्ली.कायद्याचो भंग करपी लोकां आड आमचें सरकार खर कारवाय करतलें अशें मुख्यमंत्री सुखविंदर सिंग सुखू हांणी सांगलें. हे विशीं सभाघरांत चर्चा करपाक आमी तयार आसात. पूण विरोधक हे चर्चेंतल्यान पळून वतात.
सगळ्या जाती आनी धर्मांक लागू जावपी कायदो
राज्यपालान हें विधेयक मान्य केल्या उपरांत तें राज्यांतल्या सगळ्या नागरिकांक लागू जातलें. हो कायदो धर्म वा जाती हांचो विचार करिनासतना खंयच्याय मनशाक लागू जातलो. समाजांत बेगीन लग्न करपाची पद्दत आसत जाल्यार तांकां ती बंद करची पडटली. ताका लागून हिमाचल प्रदेशांतल्या चलो वा चलयेची लग्नाची पिराय आतां २१ वर्सां आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
