भांगरभूंय | प्रतिनिधी
पणजीः हाचे फुडें दिसाचें चलन दिवपाचो अधिकार फकत पुलीस निरिक्षकाकूच आसतलो, जाल्यार रातच्या वेळार तो फकत निरिक्षक आनी उपनिरिक्षकाक आसतलो. हेर पुलिसांक चलन दिवपाचो अधिकार आसचो ना. तसो कोणेंय यत्न केल्यार ताचो फोटो संबंदीत पुलीस स्टेशनाक धाडचो. ताका निलंबीत करतले अशें मुख्यमंत्री डॉ. प्रमोद सावंत हांणी शुक्रारा पत्रकां कडेन उलयतना सांगलें.
थळाव्या लोकां कडल्यान तशेंच राज्यांक भेट दिवपी पर्यटकांक कडल्यान चलना संबंदी कागाळी वाडत आसात. कांय पुलीस कारणा बगर चलन दितात असो आरोप पर्यटक करतात. अशा घडणुकांनी गोंयचें नांव इबाडचे न्हय हे खातीर हाचे फुडें चलन दिवपाचे अधिकार पुलीस निरिक्षक आनी उपनिरिक्षकांक जारी दिल्यात. निरिक्षक आनी उपनिरिक्षक सोडून हेर कोणूय पुलीस चलन जारी करतना दिसल्यार ताचो फोटो संबंदीत पुलीस स्टेशनाक धाडचो. ते उपरांत ताचेर खर कारवाय जातली. तशेंच गरज पडल्यार ताका सेवेंतल्यान निलंबीत करतले अशें मुख्यमंत्र्यांनी सांगलें.
मजगतीं, येरादारी नेमाचें उल्लंघन केल्ल्यान वाहन चालकांक चलन जारी करतना निरिक्षक आनी उपनिरिक्षकांकडेन बॉडी कॅमेरे आसप म्हत्वाचें असोय उल्लेख तांणी केला.
दर्यादेग आनी रस्त्या कुशीक रांदपी पर्यटकांचेर कारवाय
गोंयांत येवपी कांय पर्यटक दर्यादेग आनी रस्त्या कुशीक रांदतात. हाका लागून अशा वाठारांनी कोयर जाता. ते खातीर गोंयांत येवपी पर्यटकां कडल्यान अशें प्रकार सोंसचें नात. तांचेर कारवाय करतले. तांचें कडलें गॅस वा स्टोव्ह शिमेचेर जप्त करतले अशी शिटकावणी मुख्यमंत्र्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
