भांगरभूंय | प्रतिनिधी
आयज जाता झी- ५ ओटीटीचेर प्रदर्शित
पणजी : अभिनेतो नवाजुद्दीन सिद्दीकी हांचो ‘कॉस्ताव’ चित्रपट बिरेस्तारा, १ मेक झी-५ ह्या ओटीटी माध्यमाचेर प्रदर्शीत जाता. चित्रपटान १९९१ वर्सा घडिल्ले घडणुके पसून प्रेरणा घेतल्या. घडणुकेचें काल्पनिकीकरण केलां. डिस्क्लेमरच्या स्वरूपांत सुरक्षा उपाय, येवजण्योय दवरल्यात. चित्रपटांत खंयच्याय पात्राक रेकॉर्डाचेर कांयच दाखोवंक नाशिल्ल्याचें निरीक्षण नोंद करून चर्चिल आलेमाव हांणी चित्रपट प्रदर्शीत करपा पसून आडावपा विशीं केल्ले मागणेक गोंयच्या उच्च न्यायालयान न्हयकार दिला. हे विशींचो आदेश न्या. वाल्मिकी मिनेझीस हांणी दिला.
हे विशीं चर्चिल आलेमाव हांणी मडगांवच्या पयलो वर्ग न्यायालयांत ‘कॉस्ताव’च्यो निर्माता सेजल शाह सयत भानुशाली स्टुडिओज लिमिटेड आनी बॉम्बे फेबल्स मोशन पिक्चर्स हांचे आड १०० कोटी रुपयांच्या मानहानीचो दावो २०२४ त दाखल केलो. हातूंत तांणी हो चित्रपट आपल्या कुटुंबीयां कडेन संबंदीत १९९१ वर्साचे घडणुकेचेर आदारून आशिल्ल्याचो दावो केला. हे घडणुकेंत तांच्या भावाक मरण आयिल्लें. भांगर तस्करीच्या आरोपांत न्यायालयान तांची निर्दोश सुटका केल्या. चित्रपटांत कस्टम अधिकारी कोस्टा फर्नांडीस हिरो, आनी आपल्या कुटुंबीयांक व्हिलन केल्ल्याचो दावो केल्लो. न्यायालयांत चर्चिल हांणी चित्रपटाची निर्मिती थारावपाची मागणी केल्ली. ही मागणी न्यायालयान भायर मारली. हाका आलेमाव हांणी उच्च न्यायालयांत आव्हान दिल्लें.
मजगतीं, ह्या चित्रपटांत एका कस्टम अधिकार्याची काणी आसा. चित्रपटांत घडणुकेचें काल्पनीक स्वरूप दाखयलां. डिस्क्लेमर तशेंच सुरक्षा उपाय येवजण्यो आखिल्ल्याचो दावो चित्रपट कंपनीन केला. न्यायालयान चित्रपट प्रदर्शन आडावपाक न्हयकार दिवन अर्ज भायर मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
