भांगरभूंय | प्रतिनिधी
राजकी मळाचेर कांय गजालींचो अभ्यास करपाची पद्दत आसा. ते खातीर मंत्री, वरिश्ठ अधिकारी देश- विदेशाचे भोंवडेर वतात. थंय रातदीस केल्लो अभ्यास घट मतींत दवरून तो आपापल्या राज्यांत चालीक लायतात. उदरगतीचे नदरेन ह्यो भोंवड्यो जातात. मात, ह्या व्यापाक लागून कांय वेळार राजकी भोंवडेकारांचो थळाव्या समस्यांचो अभ्यास करपाचो उरता. तो तांणी चुकनासतना करपाक जाय. कारण त्यो समस्या तांच्या मतदारसंघा कडेन, राज्या कडेन संबंदीत आसतात. गोंयची कोयराची समस्या घेयात. फाटल्या 25 वर्सांच्या काळांत तीं खूबच वाडल्या. कोयराचो प्रस्न आमी पयलीं हातांत घेतले. फुडल्या म्हयन्यां सावन रस्त्याचे देगेक प्लास्टिकाचो कुडको दिसचो ना, अशी घोशणा 21 वर्सां पयलीं जाल्ली. त्या फुडाऱ्यान ते नदरेन यत्नूय केले. पूण कोयर वाडत गेलो आनी आतां तर ताणें वेवसायाचें रुप घेतलां. म्हणल्यार कोयर तयार जावंक ना, जाल्यार शेंकड्यांनी लोक रोजगारा विणें उपाशी पडटले. विनोदाचो भाग सोडलो जाल्यार ही सत्य परिस्थिती. आयज हजारांनी लोक कोयर एकठांय करप, ताचो विलो लावप हाचेर जगतात. कांय जाणांचे येणावळीचो पसून तो वांटो जाला आसतलो.
कोयराचोय अभ्यास जावंक जाय. गोंयांत हालींच्या वर्सांनी मेळटा थंय कोयर कित्याक दिसता? तो कित्याक लागून जाता? ताचे फाटलीं कारणां ना करप शक्य आसा? कोयर जावचो ना, हे खातीर कितें करूं येता? रस्त्यार कोयर दिसचो ना, घरा- दारांनी तो जावचो ना, हे खातीर स्वराज्य संस्था, सामान्य भौसाक कितें करपाक जाय? कोयरा कडेन संबंदीत अशा साबार प्रस्नांच्यो जापो सोदूंक जाय. लोकांनी कोयर करचो न्हय, स्वराज्य संस्थांनी तो उखलचो, मागीर केंद्रांचेर व्हरून ताचो विलो लावचो… हाचेर उलोवचेंच, पूण हो कोयर मुळांत जावचोच ना, हाचे खातीर पयलीं उपाय घेवचे. प्लास्टिक पोतयां बदला कपड्याच्यो पोतयो वापरल्यो म्हूण ही समस्या सुटावी जावची ना. कारण आतां चराचरांत प्लास्टीक भरलां. संवसारांत सध्या 50 टक्के उदक, 30 टक्के जमीन अानी 20 टक्के प्लास्टीक आसतलें!! दर्याची खोलाय आनी दोंगराची उंचाय तपासल्यार प्लास्टीक मेळटलेंच.
गोंयांत नदर वचत थंय कोयराच्यो राशी दिसपाक लागल्यात. कारण स्वराज्य संस्थांनी मेकळे सुवातींचे कोयर उडोवप्यांक दंड दिवप बंद केलां. कोयर वेवस्थापन खातें न्हिदलां. पयलीं म्हयन्याक दोन बसका जाताल्यो. पूण, फाटलीं दोन वर्सां बसकाच जावंक ना, असो आरोप आमदार मायकल लोबो हांणी केलो. ते हें खातें सांबाळटाले. म्हणटकच तांकां कोयराची बारीकसारीक म्हायती आसतली. ह्या खात्याचे मंत्री जायत जाल्यार तांकां सगलें जाग्यार घालपाची संद मेळटली. योग्य लोक योग्य सुवातेर आसल्यारुच काम बरें जाता, अशें तांणी म्हणलांच! तांचें म्हणणें आयकून सरकारान ते प्रमाण कोयराची समस्या हाताळपाची गरज आसा. उत्तर गोंयांतल्या दर्यादेग वाठारांत, शारांनी कोयरुच कोयर दिसता. पूण, पालिका, पंचायतींनी उखलिल्लो कोयर प्रकल्पां मेरेन पावना. कुडचड्यार 100 टन तांकीचो कोयर प्रकल्प आसा. थंय 200 टन कोयराचेर प्रक्रिया करप शक्य आसा. मात, जेमतेम 20 टन कोयराचेर प्रक्रिया जाता. हो प्रकल्प आसतना मडगांवचो कोयर साळगांवां हाडटात. दक्षीण आनी उत्तर गोंयांत त्या- त्या वाठारांतल्या प्रकल्पांनी तांचो कोयर वचपाक जाय, अशेंय लोबो हांणी सांगलें. प्रत्येक पालिके कडेन उणोच 25 ते 50 टन तांकीचो कोयर प्रकल्प कित्याक आसचो न्हय?
सरबराय मळाचेर कोयर चड जाता आसतलो. कारण कोयरांत चडशे खावपाचे जिनसूच आसतात. राज्यांत जांचे कडेन स्वताचे कोयर विलो प्रकल्प नात, त्या हाॅटेलांक, खाणावळींक, उद्देगांक ते सुरु करपाक सांगपाक जाय. कांय व्हडल्या उद्देग, आस्थापनांचें तसले प्रकल्प आसात. व्हडल्या हावसिंग सोसायटींकूय ते सुरू करूं येतात. स्वराज्य संस्थांनी कोयर एकठांय करपाचीं केंद्रां आसात. न्यायालयान तसो आदेश दिला. तरीय सरकारी यंत्रणांनी पळोवणी करून सगल्या पंचायत, पालिकांक तीं (आनी विलो केंद्रांय) सुरू करपाक सांगूंक फावो. जे कोण रस्त्या कुशीक कोयर उडयतात, तांकां उणोच 500 रुपयांचो दंड दिवपाक जाय. परत- परत सांपडलो जाल्यार ताका चार दीस बंदखणींत सान्न मारपाक धाडूं येता.
कोयराची समस्या सुटावी करपाक, उलोवपा बदला कृती जाय. कोयराक कोयरूच रावूं दी. ताचें भांगर करचें न्हय!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
